Lîloz Hisên/Qamişlo
Desteya Fêrkirin û Perwerdeyê ya Rêveberiya Xweser li Herêma Bakur û Rojhilatê Sûriyê, bawernameyên zarokan yên Amadeyî, Seretayî û Navîn belav kirin.
Bi bidawîbûna werzê yekemîn ya sala xwendinê, Desteya Fêrkirin û Perwerdeyê ya Rêveberiya Xweser li Herêma Bakur û Rojhilatê Sûriyê, bawernameyên zarokan li ser asta tevahî herêmê hatin belav kirin, herwiha xwendekarên serkeftî hatin xelatkirin.
Rêvebera dibistana Şerîf Redê ya asta Seretayî li taxa Xerbî ya bajarê Qamişlo Botan Ebdulhemîd Hesaf, diyar kir ku hejmara xwendekarên dibistanê bi hatina xwendekarên Şehbayê û Efrînê zêdetirî 100 xwendekaran derbas kir û wiha got: “Rêjeya serketinê gihaşt 95%, ji xwe ji refa pêşdibistan heta refa sêyan binketin tune ye.” Derbarê nirxandina werzê yekemîn ji bo dibistanê Botan Ebdulhemîd Hesaf destnîşan kir ku îqbala malbatên zarokan ji bo dibistanê baş bû, hin zehmetî derket di aliyê belavkirina pirtûkan di destpêka sala xwendinê. Pilana xwendinê baş hate derbas kirin.” Belavkirina bawernameyan li tevahî herêma Bakur û Rojhilatê Sûriyê hate belav kirin bi beşdariya malbatên xwendekaran, roj û seat jî bi biryareke Îdarî hate diyar kirin. Di dawî de Rêvebera dibistana Şerîf Redê ya asta Seretayî Botan Ebdulhemîd Hesaf hêviya serkeftinê ji xwendekaran xwest.
