Nehîr pale
Jina ku dikare têbikoşe, dibe ku kedkar û fedekar be. Ew ya herî zêde ye ku hebûna xwe diyar dike û pêdiviya civakê bi wan heye. Sozdar Cîhad (Şehnaz Omer) yek ji jinên ku bi dil û can xizmeta doza jinê dikir.
Şehnaz Omer sala 1974`an li gundê Qizil Baş ê navçeya Bulbulê girêdayî bajarê Efrînê ji dayîk bûye. Xwişka wê Sozdar û birayê wê Cîhad berî wê tevlî Tevgera Azadiya Kurd bibûn. Ew dema tevlî Tevgera Azadiyê bû navê xwişk û birayê xwe rakir.
Jina welatparêz Sozdar Cîhad sala 1999`an ji taxa Zorava ya Şamê biryar da ku rêça xwişk û birayê xwe bişopîne. Ji girêdana Sozdar a bi Tevgera Azadiyê re tê gotin aşk, dikarîbû her tiştê xwe ji bo doza xwe feda bike. Ji malbata xwe re digot eger ew tevlî nebe wê heyanî ku bimrê di gurava birçîbûnê de be. Ew cesareta wê hebû ku xwe bide ber kar û berpirsyartî rabike.
Ew yek ji jinên ku rûmeta wê li ber dilê wê gelekî ezîz bû, ji ber tucarî nedigot ez nizanim, ez nikarim, ez westiyame, yan jî destûr nedida ku gotin li ser karê wê were kirin. Diviyabû di karê wê de tucarî kêm û kurtî derneketibane.
Ji destpêka şoreşa Rojava ciyê xwe di xebatên civakî û xebatên jin de digirt. Girîngiyeke mezin dida exlaq û nirxên manewî yên civakê. Fêrnebibû ku li ser keda kesekî bijî, wê ked dikir û xizmeta gel dikir. Feraseta dibe şoreşger xizmeta gel bikin, di jiyan û têkiliya xwe ya bi civakê re, pêk anî bû. Nêzî 20 salan li hemû Kantonên Herêma Bakur û Rojhilatê Sûriyê xebitî. Li sazî û meclisên jin xebitî û her tim xizmeta jin dikir. Ji bo wê ya girîng zerarê nede kesekî û hewl dida ku erkê xwe yê li beramberî tevgerê pêkbîne.
Dewleta Tirk a dagirker ji destpêka şoreşa Rojava ve êrîşî tevger û xebatên rêxistinî yê jin dike. Bi dehan jinên têkoşer ku berpirsyartî radikirin, ked didan û erka xwe pêktanîn ji aliyê dewleta Tirk a dagirker ve hedef dihatin girtin. Şehîd Sozdar Cîhad jî 10`Çile 2025`an di encama bombebarana balafirên dewleta Tirk şehîd bû.
Şehîd Sozdar Cîhad ji ber ku jineke kedkar û karker bû, divê hebûna wê wenda nebe. Karkerên jin li hemberî sîstema feodal û kaptalîzm dest bi têkoşînê kirin. Bi hezaran canê xwe feda kirin da ku jin bighîje mafên xwe û bi rûmet bijî. Di Tevgera Azadiyê de hevala Sozdar û hemû şehîdên jin ji bo rûmet, wekheviya di navbera jin û mêr û edaletê têkoşiyan. Niha jî jin li Herêma Bakur û Rojhilatê Sûriyê têdikoşe da ku civaka demokratîk, ekolojîk û azadî xwaziya jin ava bibe. Di vê têkoşînê de hebûna jinên kedkar û karker diyare, ji ber ew tenê dikarin ji bo welatparêzî, wekhevî û edaletê dev ji hemû daxwazên xwe berdin û xizmeta jinan bikin. Jin niha ciyê xwe di nava şerê rûmetê de digrin, nirxên ku li Herêma Bakur û Rojhilatê Sûriyê dê bi ked û xwîna xwe biparêz in.
