Nehîr pale/Raqe
Gekê Bakur û Rojhilatê Sûriyê bi têkoşîn û biryardariyeke mezin xwedî li ax, destkeftî û hebûna xwe derdikeve û serî ji dagirkeriya tirk û çeteyên wê re natewîne.
Têgeha serhildan, berxwedan, xwişk û biratiya gelan li bendava Tişrînê bi wate bû. Roja çarşemê 8`ê Çile gelê Bakur û Rojhilatê Sûriyê dest bi çalakiya nobetê ya bendava Tişrînê kirin. Roja destpêkê ji kantona Cezîrê, Raqe, Tebqa û Kobanê berê xwe dan bendava Tişrînê, piştre jî her du rojan kantonek berpirsyartî radike û berê xwe didin bendava Tişrînê.
Dewleta Tirk a dagirker ji roja destpêkê ya çalakiyê heyanî niha karwanên ku berê xwe didin bendava Tişrînê bombebaran dike. Riya ji gundê Rimale yê girêdayî Sirînê heyanî bendava Tişrînê bombebaran dike da ku rê qut bike û gel neghîje bendavê, gel bi destê xwe wê rêkê çêdikin da ku erebe derbas bibin.
Gelê Bakur û Rojhilatê Sûriyê di vê çalakiyê de bi rêbazên curbecur dest bi Şerê Gelê Şoreşgerî kiriye. Di vê çalakiyê de şervan û gel ji hemû pêkhateyan (Ereb, Kurd, Turkmen) bihevre berpirsyartiya parastina bendava Tişrînê rakirine. Hejmara jinan bi qasî hejmara mêran e, zarok û ixtiyar jî hene. Li Tişrînê her kes hebûna xwe diyar dike, li wêderê feraseta xwişk û biratiya gelan piratîkî dibe.
Bi êrîşan re pêkhateya Ereb xwedî li pêkhateya Kurd derdikeve, yên Kurd jî hevaltiyê bi pêkhateya Ereb re dikin. Her du pêkhate bi hevre xwîn dirjînin, xwedî li hevdû derdikevin û dibin alîkar. Li bendavê yek ji pêkhateyên Ereb Hisên Elî anî ziman ku Kurd û Ereb hemû Sûrî ne. Hisên Elî sala 1962`an li gundê Tinêrê yê bajarê Cirniyê Kantona Tebqa ji dayîk bûye. Ew ji êla Bo-Şabane û ji destpêka rizgarkirina Kantona Tebqa ew Hevserokê Komînê ye. Hisên Elî jî yek ji çalakvanên nobetê ya bendava Tişrînê ye.
Gel bê çek li hemberî balafirên şer û yên bêmirov ên Tirkiyê têdikoşin. Ne tenê li ber xwe didin, têdikoşin, berpirsyartî radikin û gavê paşve navêjin.
Bi çalakiya nobetê ya bendava Tişrînê re gel berê xwe dide eniyê, ne şer hatiye ber deriyê mala wan. Ji roja destpêkê heyanî niha 8 sivîl Şehîd bûn û nêzî 55 sivîl birîndar bûne lê çalakî berdewam dike û ketiye roja xwe ya 11`emîn.
