Nehîr pale/Raqe
Rûstem Turkman berê xwe daye eniya şer û niha tevlî berxwedaniya bendava Tişrînê bûye. Dîroka 2`ê Kanûnê sala 2024`an ji bîra wî naçe, bûye kulek di dilê wî de û bi her kêliya berxwedanê re gelê Efrîn û Şehba di bîra wî de ne.
Şervanê QSD`ê Rûstem Turkmen (Ebdulqadir Ehmed) sala 1999`an li gundê Dudiyan yê navçeya Ezazê yê Helebê ji dayîk bûye. Sala 2015`an tevlî Cebhet El-Ekrad dibe. Şervantiya xwe ya 10 salan li Efrîn, Şehba û Cezîrê derbas kiriye, çileya 2025`an jî berê xwe daya bendava Tişrînê.
Rûstem ji sala 2019`an ve li hemberî dagirkirina dewleta Tirk a kantonên Herêma Bakur û Rojhilatê Sûriyeyê tevlî şer bûye. Ji şerê Serêkaniyê derbasî şerê Eyn Îsa bûye û niha jî tevlî berxwedana bendava Tişrîn bûye.
Şervanê QSD`ê Rûstem Turkmen li eniya Tişrînê ji rojnameya me Ronahî re axivî û wiha got: ` Min nikarîbû ez li hemberî tecawiz û dagirkirina dewleta Tirk a erdnîgariya Sûriyê bêdeng bimîn im. Gelê Efrîn du caran koçber bû, ji Efrîn derbasî Şehba bû û niha jî derbasî Tebqa, Reqa, Kobanê û Cezîrê buye. Gelê Efrîn bi vê koçberiyê re tê qirkirin û vê yekê ez gelekî êşandim. Berxwedanî û serkeftin her tim layiqî gelê me ye û em niha vê yekê pêktîn in`.
