Ronaz Silêman/Qamişlo
Şêniyên bajarê Qamişlo bi girseyî 2 endamên Yekîtiya Ragihandina Azad û 3 endamên hêzên leşkerî li goristana pakrewanan a Şehîd Delîl Saroxan oxir kirin.
Li Qamişlo merasîmeke girseyî ji bo şehîdên Ragihandina Azad Cîhan Bilgîn û Nazim Daştan, herwiha şehîdên hêzên leşkerî Diyar Qamişlo, Avzem Çiya û Luqman El-Xemîs ku di dem û cihên cûda de şehîd bibûn, li goristan şehîd Delîl Saroxan hate lidarxistin. Di merasîma oxirkirinê de bi hezaran şiniyên bajarê Qamişlo, endamên Saziyên Rêveberiya Xweser, endamên Civaka Sivîl û endamên Ragihandina Azad beşdar bûn.
Merasîm bi deqeyekê rêzgirtin li ser giyanê şehîdan dest pê kir. Piştre li ser navê Meclisa Malbatê Şehîdan Şemsîxan Gulo axivî û wiha got: “Em sersaxiyê di serî de ji mîmarê azadiyê xwediyê felsefeya jiyanê Rêber Apo re dixwazin. Rêberê min îro şerê gelê şoreşgerî li qadê pêk tê, gel hemû canfedaye. Gelê welatparêz destê xwe xistiye bin barê giran de û ya herî hêja û birûmet zarokên xwe dikin fedayê welat. Îro qad qada vî gelî ye, em ê ala berxwedan û şehîdan bilind bikin û wê tu kes nikaribe li hemberî vê yekê rêya me bigirin. Wê sala 2025’an bibe sala çareserî û serkeftinê û her çiqasî dijim êrişî me bike emê serbikevin.
Di heman demê de li ser navê hêzên leşkerî yê Eyaleta şehîda Rûbar Qamişlo Nezîr Sofî sersaxî ji Rêber Apo û
malbatên şehîdan re xwest û wiha got: “Em bejna xwe li hemberî hemû şehîdên ku di oxira azadiyê de canê xwe feda kirine ditewînin. Em çiqasî bikin em ê deyndarê şehîdan bin, lê heya dilopeke xwîn di canê me de hebe em ê şopdarê xeta wan bin. Xeta şehîd xeta herî bûha û bihêze. Van şehîdan bi israr û îradeya xwe, xwestin herin li hemberî dijminê hov şer bikin.”
Piştre li ser navê Yekîtiya Ragihandina Azad Ekrem Berekat axivî û wiha got: “14 sale gelê me bê navber têkoşînê dide meşandin. Di vê têkoşînê de zêdeyî 14 hezar şehîd oxir kirin û rojane şehîd tên oxirkirin, ev e xeta heqîqet û civakê. Em weke Ragihandina Azad erekê me yê sereke ew e ku em bibin berdevkê civaka xwe, berxwedana civaka xwe bi raya giştî re parve bikin, berdêlên wê çi be jî em ê bidin, lê em ê vê xetê biserbixin, di oxira vê xetê de Ragihandina Azad me 30 şehîd dan. Rêhevala me Cîhan Bilgîn û
Nazim Daştan ku ji Bakurê Kurdistanê ne û rûxmê hemû şert û mercên dijwar berê xwe dane qada azad Bakur û Rojhilatê Sûriyê, da ku tevlî şoreşê bibin û li ser vê daxwazê têkoşînekî bêhempa di hemû qadan de dane meşandin. Em ê tola rêvalên xwe rakin û şopdarê xeta wan bin heta dawiyê.”
Di heman çarçoveyê de li ser navê Kongra Islama Demokratîk Mele Elî Zaxuranî axivî û wiha got: “Em Rojava bi her derê nadin, dibêjin Şam şekire lê welatê min ji her derê şêrîntire. Bayê welatê min ji her bayî paqijtire.”
Di dawiya merasîmê de wesîqeyê şehîdan hate xwendin û radestî malbatên wan hate kirin, herwiha wê cenazeyê şehîd Cîhan Bîlgîn û Nazim Daştan ji bo malbatên wan li Bakurê Kurdistanê re were şandin.
