Ronaz Silêman/Qamişlo
Meclisa Jinan a Sûriyê têkildarî nirxandina rewşa jinan li hola Burc a bajarê Qamişlo komxebatek bi tevlîbûna jinên hemû pêkhateyan li ser asta Bakur û Rojhilatê Sûriyê lidar xist.
Bi insiyatîfa Meclisa Jinên Sûriyê komxebateke têlidarî rewşa Sûriyê bi giştî ku di rewşeke herî zehmet re derbas dibe, bi taybet rewşa jin di vê qonaxê de wê çawa be, li dar ket. Komxebat bi tevlîbûna jinên ji hemû pêhateyan li ser asta Bakur û Rojhilatê Sûriyê pêk hat. Beriya ku komxebat bê destpêkirin deqeyeke rêzgirtin li ser giyanê şehîdan hate rawestandin.
Di destpêka komxebatê de pênaseyeke li ser Meclisa Jinên Sûriyê hate kirin û di wê pênasekirinê de diyar bû ku jin bi salan di bin desthilatdariya dewlet û mêr de hate jiyankirin, lê bi lidarxistina şoreşê li Sûriyê ya ku di sala 2011’an de pêk hat jin gav bi gav dikarîbû xwe ji desthilatdariya dewletê heya astekê rizgar bike û di heman demê de bibe pêşeng ji şoreşê re. Herwiha jin di nava hemû qadan de dikarîbû roleke çalak û aktîv bilîze heya roja me ya îro, lê piştî ketina rejîma Baas a Eseed, guhertinên pir bi lez di tevahî Sûriyê de pêk hat, di heman demê de hikumeteke nû a demikî jî hate avakirin, lewra ji bû ku jin di vê hikumeta nû de cih bigre û xwediyê biryarê be, pêwîste yekgirtina hemû jinên Sûrî were avakirin.
Di berdewamiya komxebatê de rewşa jin beriya şoreşê û piştî şoreşê hate diyarkirin. Di heman demê de di komxebatê de gelek giftigo ji aliyê jinên beşdarvan ve hate kirin, di wan giftogoyan de jî gelek pêşinyar hatin kirin, herwiha weke Meclisa Jinên Sûriyê wê li ser van pêşinyaran kar bike, da ku rola jin di destûra Sûriya ya nû de were parastin û cihgirtin.
Zêdeyî 20 pêşinyaran di komxebatê de hatin dayîn, hin ji wan pêşinyarên sereke ev in: 2 meşên girseyî ji bo parastina mafê jinê werin lidarxistin. Sazkirina hevpeymaneke taybet ji bo jinê. Hewldana avakirina partiyeke jinan li ser asta Sûriyê. Dê ev pêşinyar bi hemû rêxistin, partî û tevgerên jinan bên parvekirin.
