Ronaz Silêman/Qamişlo
Kongreya Îslama Demokratîk derbarê hedefgirtina endamekî xwe ji hêla dewleta Tirk a dagirker ve li ser rêya Hol û Til Birakê de, li navenda xwe ya Qamişlo daxuyaniyeke nivîskî bi zimanê erebî da.
Kongreya Îslama Demokratîk daxuyaniyeke nivîskî di derbarê hedefgirtina endamekî xwe ku ji aliyê dewleta Tirk a dagirker ve li ser riya Hol û Tir Birakê hate armacgirtin, da. Daxuyanî li hola navenda Kongreya Islama Demokratîk a bajarê Qamişlo hate xwendin, herwiha di daxuyaniyê de endamên Kongreya Islama Demokratîk ên Kantona Cizîrê beşdar bûn. Daxuyanî bi zimanê erebî ji aliyê endamê Kongreya Islama Demokratîk Casir Salih ve hate xwendin.
Daxuyanî wiha hate destpêkirin: “Di vê qonaxê de li Sûriyê giştî bi taybet Bakur û Rojhilatê Sûriyê, bang tê kirin ji bo xelaskirina ji zilim û zordariyê ya ku rêjîma Baas feriz kiribû li ser Sûriyê, hîn jî xeteriya gefên derve û bi taybet ya dewleta li ser Sûriyê bi giştî û bajarên li ser sînor ên li Bakur û Rojhilatê Sûriyê heye. Dewleta Tirk ku bi salan e êrişên xwe yên sîstematîk ku bi hincetê derewîn li ser herêm û gelên me, bi hemû pêkhatiyên wê yên olî û netewî dike, bi armanca dagirkirin û koçberkirina gelê me û qirkirina çandê ku li herêmê jiyan dikin.”
‘Dewleta Tirk rêgezên mirovahiyê nas nake’
Daxuyanî wiha hate berdewamkirin: “Weke tê zanîn ev êrişên hovane ku ji aliyê balafirên bê mirov ên dewleta Tirk li ser herêma me pêk tê, wekî sûcên kuştin û hilweşandina derheqê gelê herêmê ji zarok, jin, mêr û kesên oldar, herwiha tevahî navend û binesaziya herêmê jî dike hedef, da ku herêmê giştî û tecrûbeya mirovî ya ku em pê jiyan dikin, bê rûxandin. Dewleta Tirk tu rêgezên mirovahiyê nas nake û hemû sûcên dijmirovî pêk tîne, beyî ku tu rêzgirtinê ji zagonên navdewletî re bike. Dewleta Tirk zêdeyî 10 salan gefên dagirkeriyê li ser herêma me dixwe.”
Pêwîste helwest li hemberî êrişan bê nîşandan
Daxuyanî wiha hate bidawîkirin: “Em weke Kongreya Islama Demokratîk li Bakur û Rojhilatê Sûriyê êrişên hovane ku gelê me bi hemû pêkhatiyên wê hedef digire, şermezar dikin, bi taybet hedefgirtina dewleta Tirk a dagirker ji kesên oldar re, yên ku ji bo xizmeta civak, avakirina rêgezên mirovahî û jiyana hevbeş di navbera hemû pêkhateyan li ber xwe didin. Em tekez dikin ku em ê ala berxwedan, astî û biratiyê hildin, herwiha em bang li Saziyên Olî û Navendên Cîhanî yên Neteweyên Yekbûyî dikin ku van êrişan li ser herêma me bidin rawestandin. Li ser vê bingehê jî em bang li Zanîngeha El-Ezher El-Şerîf a li Misrê û Meclisa El-Şûra li Siûdiyê dikin ku helwesta xwe li hember van êrişan nîşan bidin.”
