Hemza Sêvo/ Qamişlo
Komîteya Amadekar a Konferansa Kurd ya KNK’ê, bi beşdarbûna endamên KNK’ê û gelek rojnamevanan li bajarê Qamişlo daxuyaniyeke çapemeniyê da. Herwiha tê de hat eşkerekirin ku wê di demeke nêz de konferanseke Kurdistanî ji bo yekbûna gelê kurd li dar bikeve.
Îro Komîteya Amadekar a Konferansa ji bo bidestxistina mafê gelê kurd û lidarxistina konferaneseke netewî li ser asta Kurdistanê li Navenda Kongreya Navnetewî ya Kurdistanê(KNK) daxuyaniyeke çapemeniyê da.
Daxuyanî ji hêla endamê komîteyê, Hêvî Mustefa û Luqman Ehmê ve hat xwendin.
Di destpêka daxuyaniyê de bal hat kişandin li ser geşedanên li Rojhilata Navî û Sûriyê diqewimin, hem jî rûxandina Partiya Beis. Hem hat zanîn ku pêwîst e hevdozî ji bo bidestxistina mafê gelê kurd bê kirin.
Di berdewamiya daxuyaniyê de hat gotin ku komîteyeke amadekar ji bo lidarxsitina konferanseke navnetewî ya kurdî hatiya avakirin. Herwiha ji bo pêkanîna vê konferansê, ev komîte wê têkiliyê bi hemû saziyên civakî, partiyên kurdî re bike.
Di daxuyaniyê de hat zanîn ku armancên konferansê jî ev in:
-Bi nêrîneke lihevkirî ku maf û daxwazên gelê kurd li Sûriyê tîne ziman, derkeve holê.
-Avakirina komîteyên nûnertiyê, di nav de komîteyên diplomasî û siyasî, ji bo nûnertiya gelê kurd bixebitin. Hem jî bi aliyên peywendîdar re li hundir û derve têkiliyê deynin.
-Bihêzkirina yekîtiya neteweyî ya kurd ev yek jî bi nîqaşkirina rêbazên hevkariya partî û saziyên kurdan û derbaskirina cudahiyan.
Herwiha banga Komîteya Amadekar a Konferansê wiha bû: “Em vexwendinê li hemû partiyên kurd, hêzên siyasî, sazî û kesayetên neteweyî dikin ku bi awayekî aktîf beşdarî vê konferansê bibin û vexwendina Komîteya Amadekar û çalakiya hevbeş qebûl bikin da ku ev inîsiyatîf bibe serkeftineke ku di berjewendiya hemûyan de be.
Piştî ku daxuyanî hat xwendin, çend rojnamevanan pirsên xwe kirin û endamên komîteyê pirs bersivandin. Hêvî Mustefa di bersivdayîna pirsa nûçegihanê rojnameya me de diyar kir ku wê hewldan bên kirin ku berî sala nû konferans li dar bikeve. Lê Hêvî dest nîşan kir ku eger îsal derfet çênebe wê di destpêka sala nû de wê ev konferans bê lidarxistin.
