Hemza Sêvo/ Qamişlo
Bi serenavê ‘Guhertinên dawî li Sûriyê û bandora wan li ser hebûna kurdan, doz û mafê kurdî’ ji hêla Insiyatîfa Gel a Kurdî ya Serxbixwe komcivînek li Hola Zana hat lidarxistin. Di encamê de jî ji bo pêkanîna yekrêziya kurdî û bidestxistina mafê kurdan komîteyek ji 21 kesî hat avakirin.
Îro Isyatîfa Gel a Kurdî bi amadebûna gelek siyasetmedar, partiyên siyasî, saziyên Rêveberiya Xweser, rewşenbîr û kesayetên serbixwe komcivînek li hola Zana ya bajarê Qamişlo li dar xist.
Ev komcivîn ji hêla çalakvanê sivîl Rêber Seyda, çalakvana siyasî Ezîza Ferho, çalakvan Ebdilhekîm Holê ve hat rêvebirin.
Berî ku komcivîn dest pê bibe hemû kes tevlî xuleka rêzdariyê ji bû Şehîdan bûn.
Di destpêkê de hin nameyên kesayetên cuda yên kurd hatin xwendin. Ev name ji bo pîrozbahiya vê civînê li ser asta Kurdistan û cîhanê bûn.
Piştre jî bal hat kişandin li ser xalên sereke di serî de guhertina rewşa Sûriyê di dema heyî de, bi taybet piştî ketina rêjîma Beisê.
Herwiha di berdewamiya komcivînê de mijara xeteriya gef û êrişên dagirkeriya Tirk li ser gelê kurd hat destnîşankirin.
Di heman demê de li ser xala tunebûna lêvegereke kurdî ji bo doza kurdî, hat rawistandin.
Di berdewamiya vê komcivînê de pirs ji hêla rêveberên komcivînê ji kesên amade dihatin kirin û kesên amade bersiv didan. Kesên amade daxwaza yekrêziya kurdî, paşguhkirina pirsgirêkên kevin ê di navbera partiyên kurdî de, hem jî li darxistina kongireyeke kurdî ji bo avakirina yekşandeyekê, kirin.
Herî dawî piştî rapirsînekê li gel kesên amade, komîteyek ji 21 kesayetên naskirî û cihêreng hat avakirin. Armanca vê komîteyê beşdarbûna di şandeyeke kurdî ya hevbeş de û lidarxistina kongireyeke navnetewî ya kurdî.
