Birûc Resûl/Qamişlo
Bi beşdariya sedan ji şêniyên bajar Qamişlo û navçeyên wê, merasîmê oxirkirina şervanê hêzên Komandos Cano Qamişlo ku li Helebê şehîd bû, li goristana Şehîd Delîl Sroxan ya bajarê Qamişlo hat lidarxistin.
Bi berzkirina dirûşmên “Berxwedan jiyan e” û “Şehîd namir in” bi sedan şêniyên bajarê Qamişlo cenazeyê şervanê Komandos Cano Qamişlo( Ebd Melek Kenaş) li ser milên xwe rakirin û ber bi Goristana Şehîd Delîl Saroxan ya li Qamişloyê ve meşiyan.
Merasîm bi deqeyek rêzgirtin li ser giyanê şehîdan dest pê kir, piştre li ser navê Mclisa Malbatên Şehîdan Fatima El-Casim diyar kir ku ew sersaxiyê ji malbata şehîd Cano Qamişlo re dixwazin û wiha got: “Em soz didin ku xwîna şehîdên şoreşê li erdê nahêlin, em ê li ser şopa wan bin. Wek tê zanîn ku şehîd Cano Qamişlo pêkhateyê erebe ev jî ji cîhanê re dide xweyakirin ku tevahiya gelên herêmê parastina axa xwe dikin û bi hev re jiyan dikin.”
Di heman demê de li ser navê Hêza Leşkerî Agirî Qamişlo axivî û wiha got: “Di destpêkê de em sersaxiyê ji malbatên Şehîdan re dixwazin. Îro em ê hemî bibin cano Qamişlo û xeyalên wî pêkbinin, ku ew jî heya astekî bilin berxwedanî kir heya ku gihîşta asat pîroz a şehadetê, dijmin dixwaze em bi şehadeta hevalên xwe lawaz bibin, bê guman em ji şehadeta hevalên xwe hêz digirin, her wiha îradeya me ji planên dagirkeriyê xurtire û tu carî çavên me naşike. Heya ku dilopek xwîn di canê me de hebe emê berxwedan û tekoşînê bikin. Em ê xwe biparêzin û tola şehîd û xwe hilînin.”
Endamê Kongreya Îslama Demokratîk Umer Hemîd fedakariya hemû şehîdên Kurdistanê silav kir û soza bilindkirina asta têkoşînê da.
Merasîm bi xwendina wesîqeya Şehîd Cano Qamişlo ( Ebd Melik Kenaş) bi dawî bû û bi tilîliyên dayikan, girseya gel cenazeyên şehîd spartin axê.
