Ronaz Silêman/Qamişlo
Rêxistina Stêrk a Şopandin û Parastina Mafê zarokan bi daxuyaniyeke nivîskî dest bi kampaniya alîkarî, çalakî û lîstokan di bin dirûşmeya “Dest bi dest ji bo zarokatiyê” ji bo zarokên koçber kir.
Ji bo rewşa ku zarokên koçber tê de jiyan dikin, Rêxistina Stêrk a Şopandin û Parastin Mafê Zarokan li Bakur û Rojhilatê Sûriyê bi xwendina daxuyaniyekê dest bi kampaniyeke alîkariyê ji zarokên koçber re kir. Ev kampaniya xêrxwazîye û pêre jî çalakiyên hêşyarî û xweşyariyê ye. Herwiha daxuyanî li pêş avahiya Rêxistina Stêrk a bajarê Qamişlo bi zimanê erebî ji aliyê rêvebera Kantona Qamişlo Sebah Dendeh û bi zimanê kurdî ji aliyê Rêvebera Rêxistina Stêrk a Bakur û Rojhilatê Sûriyê Cûliya Xelo ve hate xwendin. Di daxuyaniyê de Rêxistina Nûdem, Qada Civakî, Rêxistina Sara, Meclisa Jin a Islama Demokratîk û Weqfa Jina Azad beşdar bûn.
Daxuyanî wiha hate destpêkirin: “Êrişên dewleta Tirk a dagirker bi hemû çekên giran ku di rêka komên çeteyên wê li ser herêma Bakur û Rojhilatê Sûriyê pêk tê, yek deqeyê nehatiye rawestandin. Di demên dawiyê de êrişên dewleta Tirk a dagirker û komên çeteyên wî yên li ser Heleb, Şehba, Şêx Meqsûd, Til Rifat, Kobanê û Minbic bû sedemên ku bi hezaran kes koçber bibin. Ev kes ji metirsiya ku komkojiyekî li beramberî wan were kirin, berê xwe dan herêma Bakur û Rojhilatê Sûriyê, lê di heman demê de gelek zehmetî di rêde kişandin, ji ber rewşa hewayî û girtina hemû rêyan li pêşiya wan ku bû sedemên tîbûn û brçîbûna wan, bi taybet jin û zarok herî zêde ev zehmetî kişandin.”
Daxuyanî wiha hate berdewamkirin: “Heta niha nêzî 200 hezar kes koçber bûne û li cihên ewle hatine bicihkirin, lê pêwîstiya van koçberan bi alîkariyê heye. Lewra em wekî Rêxistina Stêrk a Şopandin û Parastina Mafê zarokan, di bin dirûşmeya “Dest bi dest ji bo zarokatiyê” em dest bi kampaniyeke alîkarî, çalakî û lîstokê li hemû cihên ku têde koçber hatin bicihkirin, dikin. Ev kampaniya me di 11’ê Berfanbarê de hate destpêkirin û dema wê vekiriye.”
‘Bi hev re vî barî rakin’
Daxuyanî wiha bidawî bû: “Bi navê Rêxistina Stêrk a Şopandin û Parastina Mafê Zarokan bang li hemû kesên ku karibin alîkar bibin, di cihên xwede nemînin û gava xwe bavêjin û em bi hevre vî barî rakin li ser gelên me yên koçber.”
Bernameya kampaniyê wiha ye:
-Şopandina rewşa zarokên ku di vî şerî de piskolojiya wan hatiye xerakirin.
-Belavkirina xwarinê li ser koçberên ku nû derbasî bajar bibin.
-Belavkirina hezar cilên zivistanî li ser zarokan.
-Lîstok werin lîstin.
-Çalakî werin lidarxistin.
