Birûc Resûl/Qamişlo
Serokê Nivîsgeha Kar û Barên Penaberan Şêxmûs Ehmed diyar kir ku zêdetirî 150 hezar koçber hatine Herêma Bakur û Rojhilatê Sûriyê û wiha got: “Em bang saziyên mirovan dikin ku destekê bidin Rêveberiya Xweser.”
Pêşwazîkirina koçberên ji Heleb, Efrîn û Şehba ji aliyê gelê Bakur û Rojhilatê Sûriyeyê ve didome. Di van rojên dawî de hejmarek mezin a malbatên ku bi darê zorê ji Heleb û kantona Efrîn-Şehbayê koçber bûne, ji aliyê Rêveberiya Xweser ve têne pêşwazîkirin.
Derbarê rewşa dawî ya koçberêb Heleb û kantona Efrîn û Şehba, Hevserokê Ofîsa Karên Penaberan a Rêveberiya Xweseriya Demokratîk a Bakur û Rojhilatê Sûriyeyê Şêxmûs Ehmed ji Rojnemeya me re axivî.
Şêxmûs Ehmed di destpêka axaftina xwe de wiha got: “Di van demên dawî de êrişên pir giran li ser gelê me yên
Heleb, Efrîn û Şehbayê çêbûn, di heman demê de di rewşên pir xeter re derbas bûn. Ji ber vê yekê me wekî Rêveberiya Xweser deriyê xwe ji wan re vekir da ku bighêjin ciheke bi ewle. Her wiha hijmara kesên ku li wir jiyan dikirin nêzî 150 hazar bûn, lê niha hemû hatine herêmên Rêveberiya Xweser, hejmara malbatên koçber ên li navendên bicihanînê yên li Reqa û Tebqayê 30 heya 35 hezar derbas bûne, her wiha malbatên din jî belavî kantona Cizîrê bûne, lê mixabin gelek malbat jî hîn li çolan mane. Tevî hewldanên Rêveberiya Xweser ên bicihkirina wan lê hîna bi sedan malbat li çolan mane. Rêveberiya Xweser zehmetî û astengiyên mezin dikişîne, ji ber ku heya niha tu kes nabe alîkar û destekê nade ji bo van koçberan.”
zehmetî
Şêxmûs balkişand ser bicihkirina koçberan û wiha got: “Destpêkê me ew li bajarên Reqa û Tebqayê pêşwazî kirin, me bi awayekî demkî wan li dibistanên li bajar û gundewarên wê bi cih kirin. Ji ber hejmara wan zêde bûn, lê em ê beşek ji wan hatin şandin li kantonên Firat û Cizîrê. Maseya Krîzê li kantona Tebqayê 235 cih ku piraniya wan dibistan in û li bajarê Reqayê 60 cih vekirine. Li her navendekê nêzî 40 mal hatine bicihkirin. Divê hemahengî bi Neteweyên Yekbûyî re were kirin da kampên taybet ji wan re çêbikin. Her wiha heya niha tu planên avakirina kampên taybet ji bo koçberên ji Heleb û kantona Efrîn-Şehbayê tune ye, em hewil didin ku bi demekî kurt de me çareserî û rehtiyê ji bo koçberan bînin.”
‘Bangewazî ji bo saziyên mirovan’
Hevserokê Ofîsa Karên Penaberan a Rêveberiya Xweseriya Demokratîk a Bakur û Rojhilatê Sûriyeyê Şêxmûs Ehmed axaftina xwe wiha qedand: “Bangewaziya me ji bo hemû saziyên mirovan ku çavê xwe ji alîkariya van koçberan re ne girin. Ji ber ku ev erkekî mirovî û exlaqî ye.”
