Hemza Sêvo/ Qamişlo
Bi tevlîbûna Xwendekarên Zanîngeha Rojava Yekîtiya Xwendekarên Welatparêz ên Sûrî ji bo şermezarkirina êrişên dagirkeriya Tirk li ser herêmê li Zanîngeha Rojava daxuyaniyek da. Herwiha tê de berxwedaniya gelê Efrîn û Helebê silav kir û tevlî seferberiya giştî bû.
Îro, Yekîtiya Xwendekarên Welatparêz ên Sûrî li dijî êrişên dagirkeriya Tirk li ser Heleb û gelên Efrînê tên kirin, li avahiya zanîngehê ya li Taxa Hilêliyê daxuyaniyek da.
Herwiha gelek xwendekar ji hemû fakulteyan tevlî bûn û bi zimanê kurdî hat xwendin.
Di destpêka daxuyaniyê de êrişên dagirkeriya Tirk û çeteyên wê li ser gelên Sûriyê bi taybet gelê Heleb û Efrînê hatin şermezarkirin û wiha hat gotin: “Di destpêkê de em êrişên ku li ser xaka Sûryê tê kirin bi tundî şermezar dikin û berxwedana dîrokî ya gelê me yê li Heleb û Şehbayê nîşan dane, silav dikin. Êrişên dewleta Tirk berdewamiya plana ku Tirkiyê bi riya DAIŞ’ê bi ser nexistiye û armanca wê pêkanîna Mîsaqa Millî ye. Em dizanin ku armanca van êrişan dagirkirin û parçekirina Sûriyê û veguhertina wê ji bo navenda terora navdewletî ye.”
Daxuyanî wiha domand: “Li gorî pêvajo û rewşa heyî, em jî weke Yekîtiya Xwendekarên Welatparêz ên Sûrî seferberiyê radigihînin û tevlî qonaxa seferberiya giştî dibin û bang li tevahî xwendekarên Sûriyê dikin ku bi rihê seferberî û welatparêziyê rabin ser piya û cihê xwe di nava Şerê Gelê Şoreşgerî de bigirin, werin em bi hev re welatê xwe, rûmeta xwe û şoreşa gelan biparêzin.”
Di dawiya daxuyaniyê de yekîtiyê wiha bang kir: “Em bang li tevahî gel û xwendekarên xwe yê Sûriyê dikin ku divê bizanin yek ji armancên van êrişan ew e ku hêviyên Sûriyê yên jiyaneke azad û bi rûmet ji holê rakin. Divê li tevahî Sûriyê hemû xwendekarên ereb, kurd, suryan, asûr û turkmen ji bo rûbirûbirina van êrişên hovane, destê xwe bidin hev û yekîtiya xwe xurt bikin. Herwiha parastina ax û welat, parastina rûmeta me ye, li ser vî esasî çi dibe bila bibe, em ê rê nedin çeteyên dagirker ku xaka me ya buhişt ji xwe re bikin milk û bi lingên xwe yên qirêj pêlî axa me bikin. Em ê bi rihê şoreşa Rojava dagirkerî, kumkujî û şerê qirkirinê têk bibin.”
