Ji bo piştgiriya parlementera HDP’ê Leyla Guven ku li dijî tecrîda li ser Rêber Ocalan ketiye greva birçîbûnê li Tirbespiyê çalakiya greva birçîbûnê hat destpêkirin. 107 kes tevlî çalakiyê bûne. Di çalakiyê de Endama Rêveberiya Kongreya Star Ayhan Murad axivî û diyar kir ku ew ê li dijî tecrîdê çalaliyên xwe dewam bikin.
Bi sedan welatiyên navçeya Tirbespiyê ji bo piştgiriya daxwazên Leyla Guven û rakirina tecrîda giran a li ser Rêberê Gelê Kurd Abdullah Ocalan tev li greva birçîbûnê bûn.
Kongreya Star û Partiya Yekitiya Demokratîk (PYD) li navçeya Tirbespiyê greva birçîbûnê ji bo piştgiriya hevseroka KCD`ê û parlamentera HDP`ê ya Culemêrgê Leyla Guven li dar xist. Di seatên sibehê de bi sedan şêniyên navçeyê ji Kurd, Ereb û Suryanan berê xwe da konê grevê.
Di çalakiyê de, Endama rêveberiya Kongreya Star Ayhan Murad axivî û wiha got: “Kombûna şêniyên navçeya Tirbespiyê ji bo şikandina tecrîda girankirî li ser rêber Ocalan, bersiva rast ji gefên Erdogan re ye.”
Ayhan diyar kir ku çalakiya Leyla Guven li hemberî dewleta Tirk a dagirker, berxwedaneke mezin e û daxwaza Leyla Guvan daxwaza hemû gelan e. Ayhan wiha dewam kir: “Leyla Guven bi rêya berxwedana xwe di zindana dagirkeran de, berxwedana jina azad ku dagirkeriyê qebûl nake, nîşan da. Em jî vê çalakiyê erê dikin û piştgiriya xwe bi wê re nîşan didin.”
Çalakiya grevê bi beşdarbûna welatiyan dewam dike û hejmara kesên ku ketine grevê 107 kes e. Her wiha partiyên siyasî û saziyên sivîl berê xwe didin konê grevê.