Endamê Parlementoya Iraqê ji Koma Hevpeymaniya Bîna Mensûr Bêcî di derbarê mayîna hêzên artêşa Tirk li Iraqê daxuyaniyek da û diyar kir ku bi darê zorê be jî divê hêzên Tirk ji Iraqê bên derxistin. Mensûr Bêcî got, “Pêwîste Hikûmeta Iraqê li himberî hebûna van hêzan li ser xaka Iraqê, bêdeng nemîne.”
Endamê Parlementoya Iraqê ji Hevpeymaniya Bîna Mensûr Bêcî diyar kir ku ti sedemek nîne ku hêzên Tirkiyê li Iraqê bimînin û da zanîn ku eger bi darê zorê jî be divê, hikûmeta Iraqê hêzên Tirkiyê ji Iraqê derxe.
Endamê Parlementoya Iraqê ji Koma Hevpeymaniya Bîna Mensûr Bêcî di derbarê mayîna hêzên artêşa Tirk li Iraqê daxuyaniyeke nivîskî weşand.
Mensur Bêcî di daxuyaniya xwe de diyar kir ku hebûna hêzên Tirk li ser axa Iraqê binpêkirina serweriya Iraqê ye û ev bi ti awayî nayê qebûlkirin.
Di daxuyaniyê de daxwaz ji hikûmeta Iraqê hat kirin ku van hêzên biyanî ji nava xaka Iraqê derxe û wiha got: “Pêwîste ji vê zêdetir Hikûmeta Iraqê li himberî hebûna van hêzan li ser xaka Iraqê, bêdeng nemîne.”
Mensûr Bêcî diyar kir ku ti sedemek nîne hêzên Tirk li nava xaka Iraqê bimînin û wiha dewam kir, “Tirkiye şerê bi hêzeke Kurdî ya mûxalîf re weke bahane dide nîşan. Her wiha ev sê sale jî Tirkiye bi bahaneya şerê li dijî DAIŞ’ê di nava axa me de bi cih bûye.”
Mensûr Bêcî da zanîn ku Iraq bi hêza xwe, xwe ji DAIŞ’ê rizgar kiriye û got, “Divê hikûmeta Iraqê ji bo derxistina hêzên Tirkiyê ji Iraqê, bixebite. Eger bi darê zorê jî be divê hêzên Tirkiye ji Iraqê werin, derxistin. Pêwîste yek rojek din jî ev hêz di nava axa Iraqê de nemîne.”
Ji derveyî baregehên leşkerî yên Tirkiyê ku li Herêma Kurdistanê çêkiriye, di sala 2015’an de jî bi bahaneya beşdarbûna şerê li dijî DAIŞ’ê, baregeheke leşkerî li herêma Başîqa ya ser bi Mûsilê ava kir. Herçend gelek caran hikûmeta Iraqê ji Tirkiyê xwest ku hêzên xwe ji wir derxe jî, lê heya niha jî Tirkiye guh ne daye Iraqê û van baregehan negirtiye…ROJNEWS
