Welatiyên Efrînê yên di Kampa Berxwedanê de dimînin, diyar kirin ku wê li ber xwe bidin heta ku vegerin bajarê xwe.
Bi hatina zivistanê re welatiyên Efrînê yên di kampên Şehbayê de dimînin, gelek zehmetiyan dikişînin. Rêxistinên mirovî jî alîkariyê nadin wan.
Welatiyên Efrînê diyar dikin ku ew ê bi hev re xwe bi rêxistin bikin û alîkariya hev bikin da ku vegerin Efrînê.
Semîr Ehmed yê ji Cindirêsê ye û wiha got: “Çawa me hemû êrîş û kiryarên artêşa Tirk a dagirker û çeteyên wê derbas kirin, em ê di hundirê kampan de jî tehemul bikin, ji ber ku mayîna me li Şehbayê, bi xwe israra ji bo vegera Efrînê ye.”
Ehmed destnîşan kir ku tenê Rêveberiya Xweser tevî derfetên kêm alîkariyê dide wan.
Welatiyê bi navê Ebdo Berekat ji gundê Feqîra yê Cindirêsê, diyar kir ku tevî derfetên kêm ew di kampê de dîjin û tu rêxistinan alîkariya wan nekiriye, ne li benda alîkariya tu kesî ne. Ebdo diyar kir ku ew ê li ber xwe bidin heta ku vegerin welatê xwe.
Îbrahîm Berekat jî ji gundê Feqîra ye û wiha got: “Gelê Efrînê li pêşiya artêşa Tirk a dagirker berxwedaneke dîrokî nîşan da. Em 58 rojên berxwedanê ji bîr nakin, ji ber ku di wan rojan de serkeftin û berxwedaneke bêhempa li hember dagirkeran hate kirin.”
Berekat di dawiya axaftina xwe de wiha got. “Em li benda alîkariyê namînin, lê diviyabû rêxistinên mirovî erka xwe ya mirovî li hember gelê koçber pêk bianiyana.”…ANHA
