Li bajarê Îngostad ê Elmanyayê ciwanê Kurd ê bi navê Umît Acar li dijî tecrîda li ser Rêber Ocalan xwe şewitand. Tevgera Jinên Kurd û Dîwana Hevserokatiya KCDK-E peyama sersaxiyê dan.
Li gorî agahiyan roja Pênçşemê ciwanê Kurd ê bi navê Umît Acar li bajarê Îngolstad ê Elmanyayê agir berda bedana xwe. Li gorî agahiyên xizmên wî dane, Acar ev 3 sal in li Îngolstadê dijî û ji bo protestokirina tecrîda li ser Rêberê Gelê Kurd, hatina Erdogan a Elmanyayê û desteka rejîma Elman ji bo Tirkiyê agir berdaye bedana xwe. Hate ragihandin ku Acar ê sala 1990’an li Kozlûk a Êlihê ji dayikbûyî li herêma bi daristan a nêzî malê xwe şewitandiye.
Tevgera Jinên Kurd a Ewropa (TJK-E) û Dîwana Hevserokatiya KCDK-E peyamên sersaxiyê dan. Tevgera Jinên Kurd xemginiya xwe ya ji bo bûyerê ragihand û wiha got; “Destpêkê serê malbata Acar a bi rûmet û gelê Kurd saxbe.”
Tevgera Jinên Kurd nerazîbûn nîşanî serdana Erdogan a ji bo Elmanyayê da û wiha got; “Ev piştgirî hê bêhtir cesarata zext û kuştînê dide Erdogan.”
Tevgera Jinên Kurd balkişand li ser tecrîda li ser Ocalan û wiha dewam kir; “Ev şêweyê çalakiyê Rêberê me Abdullah Ocalan rast nabîne. Divê ciwanên me hêza xwe ji bo têkoşîna demokrasiyê bi kar bînin. Em ê girêdayî nirxê şehîdê xwe yê birûmet Umît Acar bibin.”
Dîwana Hevserokatiya KCDK-E jî di peyama sersaxiyê de wiha got; “Acar li beramberî tecrîda li ser Ocalan û desteka dewleta Elman ji bo Tirkiyê nerazîbûn nîşan da. Ciwanê Kurd Umît Acar bi vê çalakiyê peyam da hikmûta Elman û rayedarên Elman. Divê hikûmeta Merkel û rayedarên Elman wateyê bide vê çalakiyê. Divê bizanibin ku êdî sebra gelê Kurd nemaye û êdî destekê nedin Erdoganê dîktator.”
