Serokê Eşîreta Şêx Xelef û mezinê gundê Guhbel Şêx Emer El Ecac diyar kir ku kesên di fermana 3’yê Tebaxê de alîkariya DAIŞ’ê kirine, niha dîsa vedigerînin gundên Şengalê û rexne li hikûmeta Iraqê kir. El Ecac bang li Serokeşîrên Ereban jî kir ku bi hevre kesên di komkujiyê de cîh girtine bigirin û teslîmî edaletê bikin.
Li Şengalê piştî ku herêm ji çeteyên DAIŞ’ê hate rizgarkirin, gelek malbatên koçber bibûn, vegeriyan malên xwe. Ji bilî malbatên Êzidî, malbatên Ereb ên ku ji gundên xwe derketibûn jî vedigerin.
Lê belê tê gotin ku di nava welatiyên ku vedigerin gundan de kesên ku li gel DAIŞ’ê di fermana 3’yê Tebaxa 2014’an de cîh girtine jî hene.
Di 28’ê Tebaxê de jî di bin parastina hêzên artêşa Iraqê de welatiyên Ereb ên 15 gundên girêdayî Şengalê vegeriyan malên xwe. Li gorî welatiyên Şengalê di nava van malbatan de hin kesên ku di fermanê de piştgirî dane çeteyên DAIŞ’ê hene.
Serokê Eşîreta Şêx Xelef û mezinê gundê GuhbelŞêx Emer El Ecac têkildarî mijarê axivî û bibîr xist ku hîn jî gelek keç û xortên Êzidî di destê çeteyên DAIŞ’ê de ne, lê hikûmeta Iraqê bêyî ku nêrîna wan bigire kesên tiliya wan di xwîna Êzidiyan de heye tîne herêmê.
El Ecac destnîşan kir ku kesên alîkariya DAIŞ’ê kirine û gelê Êzidî qetil kirine niha tînin herêmê û wiha got: “Em dibînin ku bi biryara hikûmeta Iraqê kesên destê wan di xwîna Êzidiyan de heye, careke din tînin kêleka me û dixwazin em bihev re bijîn.”
El Ecac diyar kir ku hikûmeta Iraqê tu hesaban ji bo gelê Êzidî nake û got: “Niha Şengal dorpêç kiriye. Rêya diçe Başûrê Kurdistanê, Rojava li ser gelê me digirin û li riya ku diçe Mûsilê jî dijminê me bicîh dike.”…ROJNEWS