Dewleta Tirk ketiye krîzeke kûr û tengijî ye

Hevserokê KONGRA-GEL Remzî Kartal diyar kir, dewleta Tirk a ji ber têkoşîna Tevgera Azadiya Kurd ketî krîza aborî pir tengijî ye.
Navenda Civaka Kurd a Demokratîk ya Goteborgê ji bo yek ji fermandarê HPG’ê Atakan Mahîr û ji bo Endamê Koordînasyona Êzîdî Zekî Şengalî ku bi êrîşa dewleta Tirk şehîd bûn bernameyek bîranînê pêk anî.
Kartal di civînê de li ser pêşketinên li Kurdistanê û Tirkiyê axivî.
Kartal got Şengalî û Mahîr ên ku bi êrîşên dewleta Tirk şehîd bûne, şervanên azadiyê yên îdeolojîk, felsefî û xwedî tecrûbeya leşkerî bûn.
Kartal got dewleta Tirk a ji ber têkoşîna Tevgera Azadiya Kurd tengijî û ketî nav krîzeke giran a aboriyê her ku diçe bêhtir êrîşkar dibe û got, ‘’Dewlet pir neçar maye. Ev krîza aborî encama şerê 3 salan ê li dijî me ye.’’
Kartal da zanîn di nav konsepta wan de hilweşandin û tinekirina dewleta Tirk tine, ti pirsgirêka Tevgera Azadiyê bi şexsan re tine, pirsgirêka mezin bi pergalê re ye.
Kartal wiha got, “têkoşîna me bi rengekî pir berfireh mîna li Rojava wê geştir bibe. Li Tirkiyê, Îran, Iraq û Sûriyê bi hemû derfetên xwe em ê hewl bidin ku pergalê biguherînin. Alîkariya ku dewleta Tirk ji Ewropayê distîne jî bi têkoşînê divê em bidin rawestandin. Em ê hewl bidin ku gelên Ewropayê di vê mijarê de agahdar bikin.”
Kartal diyar kir ku Tevgera Azadiyê planên dewleta Tirk ên li Îdlibê xira kirine û dewleta Tirk pir tengijî ye. Kartal got; “dewleta Tirk piştî demeke ne dirêj li gel çeteyên bermahiyên DAÎŞ’ê di serî de ji Efrînê wê ji Sûriyê werin derxistin.
Kartal anî ziman ku ji bo teşhîrkirina dewleta Tirk û ji bo azadiya Rêberê Gelê Kurd Abdullah Ocalan peywira mezin dikeve ser milê Kurdistaniyên li Ewropayê.
Kartal got, “Li derveyî welat divê em gelek bixebitin. Her kes neçar e ku keda xwe tevî vê têkoşînê bike.”