Zana Roj/ Şehba
Desteya Perwerde û Hîndekariyê ya Kantona Efrîn û Şehbayê li dijî êrîşên dagirkeriya Tirkiyê yên ku ji duh ve li ser gelê sivîl û zarokan nehatine rawestandin daxuyaniyeke şermezarkirinê dan.
Êrîşên dagirkeriya Tirkiyê li ser herêma Şehbayê ji duh ve bi giranî hatine destpêkirin, di wan êrîşan de gelê sivîl û zarokên koçberên Efrînê hatin hedefgirtin û hemwelatiyek şehîd ket. Desteya Perwerdê û Hîndekariyê li hember hedefgirtina zarokan îro li Dibistana Şehîd Egîd ya li navçeya Ehdasê daxuyaniyek bi beşdarbûna dehan ji xwendekar û mamosteyan dan. Daxuyanî bi her du zimanên Kurdî û Erebî hate xwendin. Di navaroka daxuyaniyê de ev hate ragihandin.
Daxuyanî wiha hate destpêkirin: “Di dîroka şeran û qeyranan de yên ku herî zêde para xwe ji kuştinê dibînin zarok in, di heman demê de di qeyrana li Rojhilata Navîn û cîhanê û bi taybet di şerê Sûriye yê ku dikeve sala xwe ya 13’an de bi hezaran zarok bê ku pêşeroja xwe bijîn rastî kuştin û topbaranê hatin, di heman çarçoveyê de piştî şerê cîhanê yê duyemîn saziya mafê mirovan Unicef di sala 1946’an de weke saziya parastina mafê zarokên cîhanê ji qeyran û tûndiyê hat damezirandin, lê tevî van hemû tedbîran jî rojane zarok rastî kuştin û sûcên dij mirovî tên, bi taybet li herêmên Bakur û Rojhilatê Sûriyeyê dewleta Tirk û komên girêdayî wê zarokan û dibistanên zarokan bi awayekî rasterast armanc digirin, ji dîroka destpêkirina dagirkirina bajarê Efrînê ji aliyê dewleta Tirk û komên girêdayî wê ve bi dehan zarok di encama topbaranê de rastî komkujî û kuştinê hatine, bi taybet li kantona Şehbayê zarokên Efrînê yên ku bi darê zorê hatine koçberkirin rasterast di dibistan, mal û kolanan dibin armanca topbarana dagirkeriya Tirk, herî dawî jî di encama topbarana dewleta Tirk a li ser gundê Helîsa yê girêdayî kantona Şehbayê de welatiyê bi navê Mihemed Arif Hec Mehmûd ê 40 salî şehîd ket û 3 zarok jî bi giranî birîndar bûn, ev kiryarên dermirovî yên ku dewleta Tirk û çeteyên wê pêk tînin hemû yasa û pîvanên mafên mirovan binpê dikin, ev yek li pêşberî çavên hêzên gerantor ên ku di herêmê de dimînin bê ku paşvelêdereke rast li dijî wê pêk were tê kirin, bêdengiya hêzên gerantor û cîhanê li beramberî van binpêkirinan rewamendiyekê dide domandina komkujiyan di derheqê zarok û sivîlan de, domandina bêdengiyê tehlûkeyeke mezin li ser jiyana xelkên herêmê û zarokên wan çêdike”.
Di dawiya daxuyaniyê de bang li saziyên Mafê Mirovan hate kirin û wiha gotin: “Bi navê Desteya Perwerde û Hîndekariyê ya herêma Efrîn û Şehbayê em van êrîş û komkujiyan şermezar dikin, sersaxiyê ji malbatên şehîdan re û şîfaya lezgîn ji birîndaran re dixwazin û em bang li Saziya Mafên Mirovan û Saziya Mafên Zarokan dikin ku demildest van êrîşan rawestînin û xwedî li mafê zarokan derkevin, ev êrîş sûcekî dijmirovî ye û divê bi awayekî demildest bên rawestandin”.
