Kurdên li Lubnanê êrîşa Tirkiyê li dijî Şengalê bi daxuyaniyekê şermezar kirin û dan zanîn ku ev êrîş berdewama komkujiya çeteyên DAIŞ’ê ye.
Di çarçoveya helwestên li dijî hovîtiya artêşa Tirk a dagirker û êrîşa wê li ser Şengalê de, Kurdên li Lubnanê dijîn bi daxuyaniyekê diyar kirin ku ev êrîş li nîşana zêdebûna êrîşên li dijî gelê Kurd e.
Daxuyanî bi beşdariya dehan welatiyên Kurd li Beyrûtê hate xwendin.
Daxuyanî wiha ye:
“Tirkiye bi van êrîşên xwe hemû pîvan û qanûnên Neteweyên Yekbûyî yên girêdayî qedexekirina destdirêjiya li dewletên cîran binpê dike. Êrîşa Tirkiyê di roja çaremîn a salvegera komkujiya çeteyên DAIŞ’ê li gundê Koço yê Şengalê de nîşaneke din a alîkariya Tirkiyê bi çeteyên DAIŞ’ê re ye.
Rêjîma Tirkiyê ya faşîst siyaseta tunekirinê li ser gelên herêmê dimeşîne. Êrîşa dewleta Tirk a dagirker li Şengalê nîşan dide ku Erdogan asta dijminahiya xwe dijî gelê Kurd bilind kiriye û di rêbazên înkar û tunekirinê de bi israr e.
Em wek Kurdên li Lubnanê van êrîşên Tirkiyê li dijî gelê Êzidî wek destdirêjiyeke li dijî giştî gelê Kurd bi nav dikin.
Em bang li civaka navneteweyî, Neteweyên Yekbûyî û Konseya Ewlehiya Navneteweyî dikin ku rê li pêşiya van destdirêjiyên Tirkiyê bigirin û sûcdaran ceza bikin. Em soz didin gelê xwe ku em ê asta têkoşîna xwe ber bi azadiyê ve bilindtir bikin.”
