Dîsa windahî, ji nav me barkir û çû, dilên bi hezaran zîz û jar kir. Rûndikên dayîkên êzîdxanê ku hîn li ser zar û mindalên xwe zuhanebûne, ji nûde mîna kaniyên çiyayên Edûl û Derwîşan herikbar kir. Birînên ku hîna ne hatine girtin vekir. Dîmenên hovîtiya celadên sedsala bîst û yekemîn dîsa di ber çavên xwedê de derbas kir. Gotin ji wateya xwe derket, nivîs ji peyvan şerm dike û rûpel şîrove û wesfên te napejerîn e û dibêje xêz û rûpelên min têra te nakin, ancax dîrok te binvîse û bikaribe we mayînde bike. belê hûn in, yên ku sîh û neh salên xwe ji bo azadiya gelê heftê û çar fermanan bû sembola tekoşîn û fedekariyê.
Xwedawend li bermeber bejna we şerm dikin, ji ber ew dizanin bê çare ne û nikarin cîhana ku afirandine ser û bin hev bikin û yên çê û xirap ji hev derxînin. Ew xwedewand nizanîbûn ku wê hin mîna Egîd û Mamo Zekiyan bibin sembolên 15’ê Tebaxê û di mêjuya avakirina mirovahiya bê bext ya wan xwedewendan de bikevin dewsa wan û mirovahiyê ji nû de ava û bi wate bikin.
Helbet, şehadeta te ne tenê windahiye, felaket û keraset e, dilên gelek kurtêlxwar û sûxûran bi we şad dibe. ji dijmin û dagirkeran zêdetir kurmên dara me kêfxweş dibin. Lê; ew nizanin ku dawiya wan tê. Nizanin ku we bi hezaran nifş perwerde kirine û bi hezaran dil û cegera dayîkan qezenckirine. Ew nizanin bê, efsaneya ezemeta we di rûpelên dîrokê de bi tîpên zêrîn tê nivîsandin û ew bi xwe di sergoyên dîrokê de digevizin.
Erê Mamo, yê ku silavek dabe we jî şans û pîroziyeke, ji ber hemtayên we di dîroka tekoşîna rizgariya gelê kurd de nayên dîtin û dubarekirin. Tenê, nimûneyên mîna we dikarin li ser hespê Hedbanê siwar bibin û serkêşiya govenda azadiya kurdistan û kurdbuyînê bikin û bêjin “ em ji bo welatê xwe şehîd bûn” dilşad be, hûn in, yê dikarin dilşadbin, ji ber we li pişta xwe bi hezaran şervan û şagirt amede kirine ku armanc û riya we berdewam bikin.
Bi vê windehiyê divê ku, her kesê xwe kurd dibîne helwest bide, di riya netewbûna kurd de bê deng nemîne, em bixwazin wendahiyên bi vî rengî dîsa nedin. Divê em xwe zelal bikin û yên xwediyê vê dozê xwe bikin yek û li dijî van komployan bikaribin bibin bend ku carek din dubare nebin. di serî de kurmên darê ji kokê de bê hilandin û duyem jî dijminên ku ji van sîstemên genî û qirêj pêk tên bi guhertina sîstema RojhilatNavîn wê rê li ber windahiyan bê girtin.
Mamo Zekî Şingalî hûnê her tim di bîr û wîjdanê me de kolandî bin.
Sîpan CAN
