Ayşa Silêman/ Qamişlo
Endama Komîteya Amadekar a 10’emîn Kongreya PYD’ê Erîfa Bekir diyar kir ku ji girîngtirîn biryarên ku di kongreyê de hatin girtin Bilindkirina asta têkoşînê ji bo azadiya fîzîkî a Rêber Apo û çareseriya pirsgirêka kurd, tekezkirina li ser rola jinê, bilindkirina asta karê rêxistinî, pêşxistina aboriya komînal û pirojeyên hevbeş, rizgarkirina herêmên dagirkirî û vegera hemû koçberan e.
Partiya Yekîtiya Demokratîk her du salan kongireya xwe li dar dixe û di kongirê de gelek guhertin û veguhertin çêdibin û rewşa siyasî û rêxistinî jî têde tê nîqaş kirin. Di 10’emîn Kongireya PYD’ê de jimara endamên ku hazir bûbûn 770 kes bûn û 200 kes mêvan jî hatibûn. Her wiha endamên Meclisa PYD’ê hijmara wan ji 145 kesî bû 90 kes, sazûmaniya Meclisa Giştî ya nû bi vî rengî bû: 15 endam li Navenda Giştî, 13 Rêveberiya Xweser, 7 ciwan, 4 Başûrê Kurdistanê, 1 Lubnan, 1 Şam, 8 Ewropa, 4 Kantona Efrîn û Şehbayê, 4 Heleb, 4 kantona Firatê, 3 kantona Minbicê, 3 kantona Dêrazorê, 2 Kantona Reqayê, 1 Kantona Tebqayê, 10 Hesekê û 10 Qamişloyê.
Di derbarê biryar û nîqaşên kongireya PYD’ê ya 10’emîn endama Komîta Amadekar a Kongireya PYD’ê a 10’emîn Erîfa Bekir ji Rojnameya me re axivî.
Kar û xebatên ku di kongirê de hatîn kirin
Erîfa Bekir diyar kir ku Kongir bi gotina hevserokên partiya Yekîtiya Demokratîk yên berê Asiya Ebdulah û Salih Mûslim destpê kir û wiha got: “Spasname ji gelek partî, nûnerên ji derveyî welat û
di hundirê welat de hat kirin û perspektîfên Rêber Apo hatin xwendin. Di derbarê kar û xebatê 2 salan yê PYD’ê de sinfizyon hat pêşkêşkirin. Her wiha di kongirê de Meclisa malbatê Şehîdan, Rêveberiya Xweser û Kongra Star axivîn. Rapora kar û xebatên PYD’ê ya 2 salan hat xwendin û rapora Meclisa Jinê û rapora desteya dispilînê jî hatin xwendin. Ji aliyê endama Desteya Rêveber a PYD’ê Foza Yûsif ve rewşa siyasî hat nirxandin, ji aliyê delegeyên kongirê gelek pêşinyar û biryar û rexne û rexnedayîn hatin kirin. Ev delege jî endamên partî ne. Di dawiya nirxandina rewşa rêxistinî de hilbijartin dest pê kirin û di encamê de perwîn Yûsiv û Xerîb Hiso hatin hilbijartin da ku bibin hevserokê Partiya Yekîtiya Demokratîk. Paşê endamê mecilsê jî hatin hilbijartin hijmara endamê meclisê 90 kes bû, Piştî hilbijartinê rapora dawî hat xwendin.
Biryarên ku di kongrê de hatin standin!
Endama Komîteya Amadekar a 10’emîn Kongra PYD’ê Erîfa Bekir axaftina xwe wiha bi dawî kir: “Biryarên ku di dawiya Kongirê de hatin girtin wiha ne: pêşxistina sîstema perwerdekirina endaman , pêşxistina asta ragihandinê di nav kar û xebatên PYD’ê de û derbas kirina kêmasiyên girêdayî wê, xurtkirina vîna ciwanan, tekezkirina li ser girîngiya rola jinê di Şoreşê de, pêşxistina Rêveberiya Xweser, bilindkirina asta karê rêxistinî li gund û komînan, pêşketina aboriya komînal û pirojeyên hevbeş, bicihkirina berdevkên PYD’ê di nav saziyên Rêveberiya Xweser de ji bo derbaskirina astengiyên ku rastî wan tên, her endamekî PYD’ê erkdare ku hevpeymana civakî pêk bîne, rizgarkirina herêmên dagirkirî û vegera hemû koçberan yên ku ji warê xwe hatine derxistin. Pêkanîna diyaloka sûrî sûrî li ser esasê demokratîk û avakirina pêşerojeke aşityane û wekhev, tevahî gelên Sûriyê bibin xwedî mafên wekhev û parastina berjewendiyên hemû gelan û di serî de doza gelê kurd, bilindkirina asta têkoşînê ji bo bidestxistina azadiya fîzîkî ya Rêber Apo û çareseriya pirsgirêka kurd, ragirtina Rêveberiya xweser û avakirina Sûriyeke demokratî û ne navendî. Pêşxistina têkiliyên diplomasî û girêdana hevpeymanan bi aliyên kurdistanî, herêmî û navdewletî û Xurtkirin û piştgiriya hêzên QSD’ê.”
