Hevserokê Partiya Sûriya Pêşerojê destnîşan kir ku ji bilî diyaloga navxweyî ya Sûriyeyî û li gorî biryara 2254ʹan krîza Sûriyeyê çareser nabe.
Diyana Mistefa/Reqa
Di çarçoveya bernameya ku hevserokê Partiya Sûriya Pêşerojê ji bo lidarxistina civîn û hevdîtinên bi gel re daniye de, Partiya Sûriya Pêşerojê li avahiya Meclisa Gel a Bajarokê Cidêdat ê rojhilatê Reqayê civînek li dar xist. Di civînê de rewşa siyasî li tevahî herêmê hat şîrovekirin.
Di civînê de rûspiyên eşîran, endamên Meclisa Partiya Sûriya Pêşerojê û şênî beşdar bûn. Hevserokê partiyê Ebid Hamid Mehbaş rewşa siyasî ya herêmê bi giştî şîrove kir û bal kişand ser geşedanên leşkerî, siyasî û aloziyên di navbera aliyên navneteweyî de yên li Rojhilata Navîn.
Mehbaş wiha domand: “Bi sedema destwerdanên derve û aliyên hewl dide hegemoniya xwe li ser Rojhilata Navîn ferz bikin, krîza Sûriyeyê dirêj bû. Ya ku rê li ber van destwerdanan vekiriye hikumeta Şamê ya serhişk e, ji ber ku red kir ku dev ji desthilatê berde”.
Mehbaş diyar kir ku ev îsrara hikumeta Şamê û redkirina hemû însiyatîfên çareseriyê yên Rêveberiya Xweser û yên bi rêya biryara 2254, heta niha didome.
Di dawiya axaftina xwe de Mehbaş destnîşan kir ku Partiya Sûriya Pêşerojê di helwesta xwe ya piştgiriya biyannameya Rêveberiya Xweser a çareseriya krîza Sûriyeyê de bi îsrar e û got: “Em ê têkoşînê di hemû astên rêveberî û siyasî de ji bo misogerkirina çareseriya aştiyane bi rêya diyalogê û danûstandinê, bidomînin.”
Piştre beşdaran piştgirî da helwesta partiyê û diyar kir ku divê gelê Sûriyeyê li dijî destwerdanên derve hevgirtî bin”.
