Ji bo Şengalê banga tevlîbûna çalakiyan

Sîwana Meclîsên Jinên Êzidî (SMJÊ) û Navenda Yekîtiya Komelên Êzidiyan (NAV-YEK) fermana 3’ê Tebaxa 2014’an ya li dijî gelê Êzidî şermezar kir û banga tevlîbûna çalakiyan kir.
Sîwana Meclîsên Jinên Ezidî (SMJÊ) û Navenda Yekîtiya Komelên Êzidiyan (NAV-YEK) bi daxuyaniyeke nivîskî cangoriyên 3’ê Tebaxa 2014’an bi bîr anîn û banga tevlîbûna çalakiyên ji bo Şengalê kirin.
Di daxuyaniyê de ev tişt hate gotin;
“Ji bo şermezarkirina fermana 3ê Tebaxa 2014’an a li Şengalê ya li dijî gelê Êzidî, bi taybetî fermana li dijî jina Êzîdî ji bo bibîranîna cangoriyan û jinên di destê DAÎŞ’ê de weke kole hatine girtin Sîwana Meclîsên Jinên Êzîdî (SMJÊ) û Navenda Yekîtiya Komelên Êzidiyan (NAV-YEK) di 3’ê Tebaxê de ew ê çalakiyên cûr bi cûr li Elmanyayê li dar bixin.
Wek SMJÊ û NAV-YEK’ê em bang li hemû Êzidiyên cihanê dikin ku rabin ser pêyan, tevlî çalakiyan bibin û bêdeng nemînin. Em bang li hemû aliyên demokratîk dikin ku piştgiriya çalakiyên ji bo Şengalê bikin.”