Êrîşên hêzên rêjîma Sûriyê li herêmên di bin serweriya çeteyên Xalid Bîn Welîd de li Hewd Yermûk a li rojavayê Deraayê dewam dikin. Ji aliyekî din ve jî bi hezaran şêniyên Idlibê bi rêya korîdora ewlehiyê ku Rûsyayê vekiriye, ji Idlibê derdikevin.
Navenda Çavdêriya Mafên Mirovan a Sûriyê ragihand ku bombebaran û topbarana rêjîma Sûriyê li ser herêmên di bin serweriya çeteyên Xalid bîn Welîd a girêdayî DAIŞ`ê de li Hewd Yermûkê dewam dikin.
Helîkopterên rêjîmê bi bermîlên teqemeniyê herêmên El-Şecre, Abedîn, El-Qesîr û Bêt Arh bombebaran dike. Ji aliyê din ve jî li aliyê Abedîn û El-Şecre di navbera her du aliyan de şer dewam dike.
Her wiha li aliyê bakur ê bejahiya Hemayê rêjîma Sûriyê derdora bajarokê Keferzêta, bajarokê El-Letmana û gundê Merebek topbaran kirin.
Rêjîma Sûriyê bajarokê Bedama yê li bejahiya rojavayê bajarê Cisir El-Şixûr dikeve, topbaran kir.
Di heman demê de, bi hezaran sivîlên ji parêzgeha Idlibê ya Sûriyê di korîdora ku Rûsyayê li gundê Ebû El-Zihûr vekiriye re derdikevin. Ev yek jî di demekê de ku tê payîn operasyoneke leşkerî li Ildibê çêbe, pêk tê. Lê ji aliyekî din ve jî Tirkiye ji vê operasyona muhtemel bi tirs e.
Rêjîm êrîş dike, sivîl ji Idlibê derdikevin
