Heyeta ku çûbû lêkolîna şewata daristanan a ku artêşa Tirk li Amedê pêk anîbû, diyar kir ku gundiyan gotine bombeyên qazanê hatiye avêtin. Heyetê got, “Em ê gelê xwe tenê nehêlin.”
Parlementerê HDP’ê yê Amedê Mûsa Farisogûllarî yê ku ji ber şewitandina daristanên li Pasûr û Farqînê çûbû qadê diyar kir ku vemirandina agir hatiye astengkirin.
Heyeta HDP û KCD’ê piştî lêkolînkirina şewitandina daristanên li navçeyên Pasûr, Hezro û Licê ya di 28’ê Tîrmehê de ya ku ji ber operasyona artêşa Tirk pêk hatiye, daxuyanî da. Daxuyanî li ber avahiya bajêr a HDP’ê hate dayîn û endam, rêveber û parlementerên HDP’ê yên Amedê û rêveberên KCD’ê tevlî daxuyaniyê bûn.
Parlementerê HDP’ê Mûsa Farisogûllari got, “Ji Dersimê heta Amedê ji ber bombebaranê şewat derdikevin. Hat gotin ku Rewşa Awarte rabûye, lê di rastiyê de tenê navê wê hatiye rakirin. Roja ku hat gotin Rewşa Awarte rabûye ve şewatên daristanan li Kurdistanê dest pê kirin. Em çûn Pasûr û Licê û me lêkolîn kir. Piştî bombebaranan şewat derketine û ji ber qedexeya derketina derve gundiyan nikaribûye mudaxale bikin. Şewatên li herêma Eskar û Dorşînê yên Pasûrê hatine vemirandin. Gundiyan diyar kirin ku bombeyên qazanê hatiye avêtin û ji ber van bombeyan agir bi herêmê ketiye.”
Farisogûllari da zanîn ku ji pêkanînên ku bi salan hatine ceribandin tiştek dernayê û diyrar kir ku divê dewlet ji vê yekê fem bike û dev ji van rêbazan berde. Farisogûllari di dawî de wiha got: “Hewldanên me ji bo seranserê Tirkiyê pêşxistina çareseriyê ye. Di nêzikbûna rayedarên hikumetê de ji ber dijminahiya wan a li hemberî gelê Kurd, pêkanînên ku dibin sedemê mirina mirovan hene. Em bang li rayedarên hikumetê dikin. Em vê nêzikbûna hovane ya li hemberî gelê xwe qebûl nakin. Ji niha şûn de jî wê hewldanên me bidomin û em ê gelê xwe bi tenê nehêlin.”
Posta çûyî
Posta tê