Ronaz Silêman/Qamişlo
Rêveberê Ofîsa Birêvebirina Pirojeyan a Heyva Sor a Kurd Sîpan Xelîl diyar kir ku Heyva Sor a kurd her 2 salan konferansa xwe li dar dixe. Herwiha da zanîn ku ew li gorî pêwîstiya demê û ji bo xizmeta gel pirojeyan pêk tînin.
Heyva Sor a Kurd di 24`ê Mijdar de bi amadebûna 200 delgeyên xwe
yên ji 44 navendên li Bakur û Rojhilatê Sûriyeyê, Konferansa xwe ya 3`emîn di bin dirûşma “Bi Hêvî û Hevkarî ji bo Avakirina Pêşerojeke bi ronî” li dar xistibû, herwiha di Konfiransê de xebatên Heyva Sor a Kurd yên 2 salan hatibûn nirxandin.
Di derbarê konferansa 3`emîn ya Heyva Sor a Kurd Rêveberê Ofîsa Birêvebirina Pirojeyan ya Heyva Sor a Kurd Sîpan Xelîl ji rojnama me re axivî.
Sîpan Xelîl diyar ku Konferansa Heyva Sor a Kurd her 2 salan tê lidar xistin û wiha got: “Di 24`ê Mijdarê de me Konferansa xwe ya 3`mîn li darxistibû û destpêka Konferansê de danasîna Heyva Sor a kurd hatibû diyarkirin ku di 12`ê Berfanbara sala 2012`an de weke Rêxistinek serbixwe hatibû damezrandin û kesên ku destekê didin Heyva Sor a kurd ji bo ku karibên pirojeyên xwe bi rêve birin hatibûn diyarkirin weke (Medico, Medico International, AMB, YAW, KSC, CDO, GD, ITF, Waldensian, Swiss, Save The Children, Upp, PIN, IRC, NAP, HI) ev rêxistinên ku bi Heyva Sor a kurd re alîkarin ji bo birêvebirina pirojeyan. Herwiha di konferansê de endamên dîwanê hatin diyarkirin, rapora giştî ya Heyva Sor a Kurd ku tê de kar û xebatên sala 2022-2023 hatibû şîrovekirin, rapora komîteya jinê hat nirxandin, nirxandina rêzikname û derxistina Hevserokên nû jî hatibûn kirin. Ji xwe Heyva Sor a kurd li gorî rêziknameya xwe, rêxistineke mirovî û ne qezencî ye, ji aliyê Rêveberiya Xweser ve hatiye naskirin. Li ser nirx û zagonên naventeweyî ya tevgera Xaça Sor û Heyva Sor a Navneteweyî kar û xebatê dike, alîkariyê dide kesên hewcedar di rewşên şer, penaberî, karîsetên xwezayî û rewşên awart de.”
Heykeliya Heyva Sor a Kurd
Heyva Sor a Kurd destpêkê ji Ofîsa Kampaniya û Birêvebirina Piroje, Ofîsa Peywendiyên Tenduristî ku ji aliyê wê ve hemû beşên tenduristiyê tên şopandin, Ofîsa Locistîk, Ofîsa WOŞ, Ofîsa Ragihandinê, Bernameya ji bo piştgirya deruniya mirov û parastinê, Ofîsa Şopandinê, Ofîsa Çavdêrî û Nirxandinê, Ofîsa Çavkaniya Mirovî, Ofîsa darayî pêk tê, niha jî Ofîsên nû hatine avakirin wek; Ofîsa Berçavkirin, Ofîsa Zagonî û Ofîsa Erşîf jî hatine avakirin.
‘Li gorî pêwistiya demê piroje pêk tên’
Sîpan Xelîl di berdewamiya axaftina xwe de pirojeyên Heyva Sor a Kurd anî ziman û wiha got: “Pirojeyên me yên herî sereke ku ji sala 2017 û 2018`an de hatine destpêkirin û heta niha jî berdewamin wek; pirojeya Îko û pirojeyên nexweşgehên Heyva Sor a Kurd e, herwiha Yekîtiya Ewropa piştgirya hin nexweşgehên Heyva Sor a kurd dike wek; Kampa Erîşa, Ebû Xeşeb, Hol, Waşokanî (Serê Kaniyê), Kampa Mehmûdiyê li Reqa, nexweşgeha Reşîd li Reqa, Nexweşxaneya Minbic û Tebqa ya wetenî dike û ev piroje heta sala 2024`an wê dewam bike. Pirojeya 2`emîn a Korsotyom ku di aliyê guhdana tenduristî ew jî nexweşgehin, ev piroje bi giştî di warê tenduristiyê de ne, pirojeya Stes jî ji bo guhdana tenduristiyên di nexweşgehên kampa de wek kampa Waşokanî ( Serê Kaniyê) û Şedadê ku ji aliyê Heyva Sor, Upp û HI tê birêvebirin. Ji derveyî van pirojeyan, pirojeyên ku bên kirin wê li gorî pêwîstiya demê be. Ji xwe dema ku di erdhejê de li Şehba gelek ziyanên madî û canî hatibûn kirin bi riya pirojeyên Heyva Sor a Kurd û hevkarên wê jinûve avakirin pêk hatin, pirojak din jî heye ku bi riya hevkarên me yên li Başûr 130 mal li Tilqirah, Babilis û Tilsosinê werin avakirin ji bo malbatên ku di erdhejê de çûn Heleb û Şêxmeqsûdê û war tinebû lê bi cih bibin, Pirojak din jî ji bo kesên ku di girtîgeh û kampan de hewcederî nexweşaneyê bûn bên tedawîkirin. Herwiha ji aliyê Heyva Sor a Kurd ve navenda Parçeyên Mirova yên çêkirî jî ji sala 2022`an de hat avakirin.”
Pirojeyên dema pêş yên Heyva Sor a kurd
Sîpan Xelîl projeyên Heyva Sor a Kurd yên dema pêş da xuyakirin û wiha got: “Pirojeyên me yên demê pêş jî evin; piroja parastina Sivîl ev ji bi riya Medico ye, beşek li Qamişlo û beşa din jî li aliyê Şêxmeqsûd û Şehba ye, ev piroje jî ji bo perwerdekirin civakê di demên erdhejê de ku karibin xwe biparêzin, ji ber dema ku erhej pêk hat gelek ji gel nizanîbûn çawa xwe ji erdhejê biparêzin, herwiha wê amûrên pêwîst jî bên kirîn û wê hevkariya vê pirojê jî bi Şaredarî û Saziyên Xwecih re bê kirin. Herwiha Heyva Sor a kurd wê alîkariyê bide piroja Bedxwarinî û zarok ya di kampa Serdem û Berxwedanê de. Û pisgirêka Qenalên avqirêjiyê ku li van ciyan derketibûn çareser bike. Herwiha nexweşxaneya Şewat, kansêr û telasîmiyayê ya li bajarê Qamişlo, navenda Mamogirafîk tevlî vê nexweşaneyê bû, ew jî giredayî tespîtkirina zû ya benceşêra pêsîran li cem jinan.”
‘Kêmbûna alîkariyê astengiyan derdixe’
Sîpan Xelîl di dawiya axaftina xwe de wiha got: “Di Heyva Sor a Kurd de odeya operasyonan heye, ji aliyê 64 ambolansa ve tê birêvebirin, dema rewşên awirte derkevin wê agahiyê bi odeya operasyonan, ji bo ku agahiyê bidin nexweşxaneyê. Herwiha 13` xalên tenduristiyê di hundirê kampan de û 15` li bajaran hene. Navendên Heyva Sor a Kurd li Bakur û Rojhilatê Sûriyê bi giştî 45 navendin. 5` Kilînokên Gerok jî ku li Reqa, Tebeqa, Dêrazorê, Minbic û Hesekê hene, ji ber gelek gund xalên tenduristiyê dûrî wê ne, ji bo wê bi riya van kilînokên Gerok xwe bighînin nexweşaneyan. Ji xwe navenda Heyva Sor a Kurd li Amûdê dermanên nexweşiyên demdirêj belav dike, lewra Heyva Sor a Kurd ji sala 2012`an ve alîkariyeke baş li Bakur û Rojhilatê li gorî derfetên xwe pêk anî, lê sal bi sal bêtir xwe bi rêxtin dike. Niha jî derdora 1200 endamî cihê xwe di nava Heyva Sor a Kurd de digire. Astengiyên ku Heyva Sor a Kurd rastî wê tên kêmbûn alîkariyê ji bo Bakur û Rojhilatê Sûriyê ye.”