Ji ber erdhejê nêzî 300 kes birîndar bûn

Li eyaleta Kirmanşanê ya Rojhilatê Kurdistanê, roja Yekşemê bi şîdeta 5.9 pileyî erd hejiya û nêzî 300 kes birîndar bûn.
Waliyê Kirmanşanê Hûseng Bazvand got, “ji ber erdhejê herî kêm 287 kes birîndar bûne.” Bazvand diyar kir ku tedawiya piraniya birîndaran qediya ye û ji nexweşxaneyan derketine.
Erdheja ku li Taze Abadê rû da, li bajarê Garb ê Îslamabadê û Sarpolê Zahab û li hin gundên eyaletê bû sedema xisarê. Li gorî rayedaran li 43 gund û 101 wargehan xisareke giran rû daye.
Mijdara 2017’an li eyaleta Kirmanşanê bi şîdeta 7.3 pileyî erd hejiya bû û 620 kesan jiyana xwe ji dest dabûn, 12 hezar kes birîndar bûbûn. Li Başûrê Kurdistanê jî 8 kes miribûn.