Divê li dijî îdamê îradeyeke xurt hebe

Li dijî darvekirina Ramin Hisên Penahî li Silêmaniyê çalakiyek hat li dar xistin, di çalakiyê de birayê Ramin Hisên Penahî diyar kir ku ger li Rojhilatê Kurdistanê îradeyek netewî were avakirin, wê rejîma Îranê nikaribe wê îradeya bişkîne.
Çalakiyên li hember cezayê darvekirina Ramîn Hisên Penahî berdewam dikin. Bi vê boneyê roja 22’ê tîrmehê bi pêşengiya Desteya Parastina Zindaniyên Siyasî û kampanya “Na ji bo darvekirina Ramîn” li parka Nalî ya bajarê Silêmaniyê bi beşdariya hejmarek welatî, parlamenter û pêkhateyên din çalakiyek hat li dar xistin. Di çalakiyê de hat xwestin cezayê darvekirinê yê Ramîn Hisên Penahî û hemû girtiyên din yên siyasî were xirakirin.
Di çalakiyê de endamê Komeleya Zindaniyên Siyasî yê li Silêmaniyê Mihemed Pişder daxuyaniyek a çapemeniyê da û got; “Cezayê darvekirina girtiyên siyasî li Îran û hinek welatên din hê jî dewam dike, ev yek li dijî mafê mirovane. Em bang li rejîma Îranê dikin ku cezayê darvekirina Ramîn Hisên Penahî û hemû girtiyên din yên siyasî betal bike. Ger ev yek pêkwere wê ji bo rejîma Îranê di aliyê azadiyê de destpêkek erênî be.”
Piştî wê birayê Ramîn Hisên Penahî, Refîq Hisên Penahî jî axivî. Penahî destpêkê spasiya hemû kesên ku ji bo Ramîn Hisên Penahî dinava çalakiyan dene kir û wiha axivî; “Ger îradeyek netewî li Rojhilatê Kurdistanê pêkwere, wê Komara Îslamî ya Îranê nekare îradeya me bişkîne. Ragihandinên Başûrê Kurdistanê jî dikarin ji bo mafê parçeyên din hê zêdetir kar bikin.”