Hevserokê Giştî yê HDP’ê Sezaî Temellî diyar kir ku ya girîng ne meclîs e, têkoşîn e.
Hevserokê Partiya Demokratîk a Gelan (HDP) Sezaî Temellî li gel parlamenterên HDP’ê li Wanê berê xwe dan Agiriyê.
Temellî anî ziman ku di bin şertê OHAL’ê de hilbijartina 24’ê Hezîranê bi her cûre dek û dolaban pêk hatiye û got: “Bi walî, qeymeqam, polîs û leşkerên xwe kampanyaya hilbijartinê bi rê ve birin. Bend danîn pêşiya me, lê me bi hev re hilweşand. Em ê li tax, kolan, kargeh û bajarên û li her deverê li dijî vê pergala OHAL’ê û faşîzmê têkoşîna xwe mezintir bikin.”
Temelî wiha dewam kir, “Em dengê gel in. Em ê li dijî faşîzmê vê têkoşînê bi hev re rêxistin bikin. Wekîlên me di navbera gel û parlamentoyê de pir in. Em ê li her deverê bi wekîlên xwe re rêxistinbûyînê bikin. Em ê li cem hemû mexdûrên vê pergalê cih bigirin û xebatên xwe yên rêxistinê bi rê ve bibin. Em ê ba hêzên demokrasiyê xebat û têkoşînê bikin. Em di rojên tarî de derbas dibin, ên vê parçe bikin jî em in. Em ê bi soza me daye cangoriyan û hêza me ji wan girtiye rêya xwe bidomînin.”
EV WELAT BER BI HILWEŞANDINÊ VE DIÇE
Temellî bal kişand ser krîza aborî ya di rojevê de ye û got: “Krîzên aborî, siyasî û civakî hemû bi hevre tên jiyîn. Ev desthilatdar, ji ber hêrsa di desthilatdariyê de bimîne, ev welat ber bi hilweşînê ve bir. Weke ku hemû kes jî dizane dijminantiya gelê Kurd bingeha krîzan ava dike. Dawî li şer û xizantiyê anîn di destê me de ye. Em ê bi hev re têkoşîna aştî û demokrasiyê bilind bikin û bi ser bikevin. Em ê di serdema nû de jî bi bilindkirina têkoşînê vê desthilatdariyê ji holê rabikin.”
Tirkiye ber bi hilweşînê ve diçe
