Serhildana gel li Rojhilatê Kurdistan û Îranê bênavber dewam dike, tevî ku rêjîma Îranê li hemberî serhildêran şidet, girtin û kuştinê jî dike, serhldan bi biryardariyeke mezin didome.
Navenda Nûçeyan
Piştî qetilkirina keça Kurd ya bi navê Jîna Amînî di 12’ê Îlona sala 2022’yan de ji aliyê polîsên hîcab ên rêjîma Îranê ve, jinên Rojhilatê Kurdistan û Îranê, di bin dirûşmeya ’JIN JIYAN AZADÎ’ dest bi xwepêşandan kirin, xwepêşandan veguherîn serhildan û li tevahiya Rojhilatê Kurdistan, Îran û cîhanê jî belav bû. Serhildana ‘Jin, Jiyan, Azadî’ ku li tevahiya cîhanê hatiye nasîn û deng vedaye, 5 mehan temam dike. Tevî ku rêjîma Îranê li hemberî serhildêran kuştin, girtin û darvekirinê jî dike, lê serhildêr bi biryardariyeke mezin serhildana gel didomînin û gavan bi paş ve navêjin.
Di 17’ê Sibatê de tevî ku hêzên rêjîma Îranê gelek leşker anîne parêzgeha Sîstan û Bilucistan , herwiha tevî rewşa seqemê jî,li bajarên weke Zahîdan û Xaş meş û xwepêşandanên mezin hatin li darxistin. Xwepêşanderan li dijî kiryarên rêjîma Îranê dengê xwe bilind kirin. Her wiha xwepêşanderan daxwaza azadkirina girtiyên serhildanê û bidawîanîna pêgavên girtin û vexwendina çalakvanan ya ji bo dadgehê kirin.
Di heman çarçoveyê de di 17 Sibatê de li bajarên Sine û Serdeşt ên Rojhilatê Kurdistanê, li dijî girtina melayên ku piştgiriya xwepêşanderan kiribûn, xwepêşandan hatin li darxistin.
Li gundê Nenele yê bajarê Sine jî ,li ber mizgefta gund çalakî hat li darxistin û nerazîbûn li dijî siyaseta zext û tesfiyekirinê ya rêjîma Îranê hat nîşandan. Her wiha xwepêşanderan daxwaza berdana Mela Îbrahîm Kerîmî Neneleyan kirin ku ji beriya 3 heftiyan bi tewambariya piştgiriya xwepêşandanan kiriye, ji aliyê rêjîma Îranê ve hatibû girtin.
Herwiha li bajarê Serdeştê jî xelk li dijî girtina melayê mizgefta gundê Marexan Mela Fethula Rostemî kombûn û daxwaza serbest berdana wî kirin. Mele Fethula Rostemî deam refaqetiya karwanê alîkariya ji bo mexdûrên erdhejê yên bajarê Xoy’ê dikir, li xala kontrolê ya bajarê Urmiye ji aliyê rêjîma Îranê ve hat binçavkirin û ber bi cihek nediyar ve hate birin.
Di 17’ê Sibatê de li bajarokê Galîk a ser bi parêzgeha Gulistan ve li dijî ji kar dûrxistina melayê bajarê Azadşehîr Mela Mihemed Hisên Gurgîc, xwepêşandan hat li darxistin.
Li gorî rapora Koma Çalakvanên Mafên Mirovan a Îranê ku di 16’ê Sibatê hat weşnadin, di şeş mehên borî de 71 jê zarok herî kêm 529 xwepêşander, ji aliyê rêjîma Îranê ve hatine qetilkirin, 19 hezar û 763 kes hatin girtin û ji 14 hezar û 698 kesan re jî cezayê girtîgehê hatin dayîn. Di berdewamiya raporê de hatibû diyar kirin ku 791 kes di dadgehan de hatinê cezakirin, 4 çalakvan hatiye darvekirin û ji kesên hatin girtine 107 kes bi xetereya darvekirinê re rû bi rû ye.
