Hêzên Sûriya Demokratîk ragehand ku li rojhilatê Dêrazorê hêzên wan û bi hevkariya hêzên Koalîsyona Navneteweyî 2 operasyon li dijî şaneyên çeteyên DAIŞ′ê kirine û di encamê de 2 serçeteyên DAIŞ′ê hatine kuştin.
Navenda Nûçeyan
Navenda Ragihandina Hêzên Sûriya Demokratîk (QSD) bi daxuyaniyekê ragihand ku hêzên wan li dijî şaniyên DAIŞ’ê 2 operasyonên ewlehiyê li rojhilatê Dîrazorê lidar xistin.
QSD’ê di daxuyaniya xwe diyar kir ku di çarçoveya serdegirtina şaneyên rêxistina DAIŞ′ê ya terorîst de, hêzên wan 16′ê Sibatê 2 operasyonên ewlehiyê li dijî şaneyên rêxistinê li rojhilatê Dêrazorê pêk anîn û wiha domand: “Di operasyona yekemîn de ku YAT′ê bi desteka hêzên Kaolîsyona Navneteweyî pêk aniye, li navçeya Sebhe ya rojhilatê Dêrazorê li dijî serçeteyekî rêxistinê bi navê Muhened El Sarî El Fedxem bû. Ew yek ji xetertirîn çeteyên rêxistina DAIŞ′ê bû. Wî li dijî hêzên me kiryarên suîqastkirinê pêk dianîn. Piştî dorpêçkirina herêma ku ew lê bû, YAT′ê banga teslîmbûnê kir, lê red kir. Dûvre pevçûn çêbû û ew hate kuştin.”
QSD’ê da xuyakirin ku operasyona duyemîn jî li gundê Hacine yê li rojhilatê Dêrazorê pêk hat û wiha got: “Yekîneyên me bi hêzên Koalîsyona Navneteweyî re hêzên xwe daxistin da ku serçeteyê rêxistina DAIŞ′ê yê bi navê Hemze El Humsî bigirin. Ew dever hate dorpêçkirin û banga radestbûnê hate kirin. Lê wî xwe teqand, di encamê de hate kuştin û 4 leşkerên hêzên Kaolîsyona Navneteweyî birîndar bûn.”
Navenda Ragihandina Hêzên Sûriya Demokratîk (QSD) di dawiya daxuyaniya xwe de da zanîn ku di her du operasyonan de gelek çek û amûrên leşkerî yên li gel terorîstan hatin girtin.