Bi wesîleya salvegera Komploya Navneteweyî tevger, partî û rêxistinên Kurdistanî daxuyanî dan û Komploya Navneteweyê ya li dijî Rêberê Abdulah Ocalan şermezar kirin. Herwiha banga geşkirina têkoşînê ya li dijî komployê kirin.
Navenda Nûçeyan
Bi wesîleya salvegera Komploya Navneteweyî ya 24’an gelek tevger, partî û rêxistinên Kurdistanê daxuyanî dan.
Hevserokatiya Konseya Rêveber a KCK’ê di salvegera 24’an a Komploya Navneteweyî ya 15’ê Sibatê de daxuyaniyek weşand û di daxuyaniya xwe de bang li gelê Kurdistanê, dostên gelê Kurd û hêzên demokratîk û şoreşgeran hemûyan kir ku nerazîbûna li dijî komployê hîn bi xurtir nîşan bidin. Herwiha bang li hêzên tevlî komploya navneteweyî bûne kir, ku dest ji vê helwesta xwe berdin û piştgiriyê nedin polîtîkaya qirkirina Kurdan a desthilatdariya AKP-MHP’ê ya faşîst.
Di heman çarçoveyê de jî, Tevgera Civaka Demokratîk (TEV-DEM) daxuyaniyek weşand û tê de komploya navneteweyî şermezar kir. Herwiha bang li hemû hêzên siyasî, neteweyî yên Kurdistanê, Ereb û Suryan û rêxistinên civaka sivîl û tevahî beşên civakê yên Bakur û Rojhilatê Sûriyeyê kir ku, ji bo parastina nirxên Rêber Ocalan têkoşîn û berxwedanê geş bikin.
Koordînasyona PAJK’ê jî derbarê salvegera 25’an a Komploya Navneteweyî ya li dijî Rêberê Gelê Kurd Abdullah Ocalan, daxuyaniyeke
nivîskî weşand. PAJK’ê da zanîn ku parastina Rêber Apo parastina azadiya jinê û mirovahiyê ye. Herwiha da xuyakirin ku divê di serî de jin, ciwan û gelê Kurd di sala 25’an ya Komployê de tekoşîna xwe bilindtir bikin.
Bi heman wesîleyê Navenda Parastina Gel (NPG) daxuyaniyek weşand û diyar kir ku Gerîlayên Azadiya Kurdistanê bi biryar in ku teqez Komploya Navneteweyî bi hemû aliyan ve parçe bikin, erk û berpirsyariyên xwe yê ji bo azadiya fîzîkî ya Rêber Apo bi cih bînin.
Herwiha Tevgera Jinên Azad (TJA) bi daxuyaniyekê jî, daxuyaniyek weşand û bang kir ku divê têkoşîna ji bo azadiya Abdullah Ocalan li her derê were geşkirin û bal kişand ser keda mezin a ku Rêberê Gelê Kurd Abdullah Ocalan daye têkoşîna azadiya jinan.
Koordînasyona KJK’ê bi wesîleya salvegera Komploya Navneteweyî ya 15’ê Sibatê daxuyaniyek weşand û diyar kir ku divê ew di nav refên azadiyê de bibin yek, berxwedanê geş bikin û jiyana azad ava bikin. Hrwiha da zanîn ku li ser vê bingehê ew ê teqez Komploya Navneteweyî ya li dijî Rêbertî, jin, gel hatî kirin, pûç bikin.
Tevgera Jinên Kurd a Ewropayê (TJK-E) jî bi heman wesîleyê daxuyaniyeke nivîskî weşand. TJA-E di daxuyaniya xwe de da zanîn ku Komploya li dijî Rêber Apo li dijî jinên azad, Kurdên azad û mirovahiyê ye, têkoşîna li dijî vê pêkanînê di şexsê Rêber Apo de parastina jina azad û civaka azad e.
