Zana Roj / Şehba
Koçberên Efrîn û gelên Şehbayê li dijî dorpêça hikumeta Şamê ya li ser herêma Şehbayê meşek girseyî li dar xistin û helwesta hikumeta Şamê bi tundî şermezar kirin.
Ji bo şermezarkirina dorpêça giran ya ku hikumeta Şamê li ser herêma Şehbayê feriz kiriye, gelên herêma Şehba û koçberên Efrînê meşek girseyî li dar xistin.
Meş li navçeya Ehdas ya Şehbayê bi beşdarbûna bi sedan ji welatiyên herêma Şehbayê û koçberên Efrînê hat destpêkirin.
Di meşê de banga rakirina dorpêçê û derbaskirina alîkariyê ji bo gel hat kirin.
Her wiha di dawiya meşê de ji aliyê Rêveberiya Xweser ve daxuyaniyek hat xwendin.
Di daxuyaniyê de wiha hat gotin:”Di serî de em ji bo mirovahî û malbatên qurbaniyên ku di encama erdheja wêranker a hefteyek berê li Suriyê û Tirkiyê qewimiye de, sersaxiyê dixwazin û ji birîndaran re şîfaya lezgîn dixwazin.
Rêveberiya Xweser a Bakur û Rojhilatê Suriyê di ragihandina hevxemiya xwe bi qurbaniyên kareseta erdhejê de çalak bû û kerwanên alîkariyên mirovî ji bo pêşkêşkirina wan ji bo qurbaniyên li herêmê hikumeta Şamê , Opizisyon û herêmên Rêveberiyê li Şehba, qurbaniyên Helebê rê kir.
Heta niha ji ber lihevkirinên siyasî yên şaş ku berjewendî û pêşeroja gelê Suriyê bi hemû pêkhateyên wê re temsîl nake, hikumeta Şamê alîkariya gelê Suriyê qebûl nake û rê nade k u alîkariyê bigihînin me.
Em koçberên Şehba û Efrînê banga hikumeta Şamê dikin ku nakokiyên siyasî derbas bikin û dergehên derbasbûna alîkariyên mirovî ji bo hemû gelê Suriyê û koçberên Şehba vekin. Her wiha em banga rêxistinên navneteweyî û komeleyên xêrxwaziyê dikin ku bi lez destwerdana mirovî li herêmên Şehba bikin û êş û azarên koçberan sivik bikin.”
