Seroka Komeleya Nûjîn û mamosteya zimanê Kurdî Zara Mihemed ku ji ber perwerdekirina zarokan bi zimanê Kurdî di sala 2020’’an de ji aliyê rêjîma Îranê ve hatibû girtin, hat berdan.
Navenda Nûçeyan
Zara Mihemedî di sala 1990’an de ji dayik bûye û di heman salê de dayika wê jî jiyana xwe ji dest daye û ji aliyê bavê xwe ve hatiye mezinkirin.
Zara Mihemedî ku bi xebatên ji bo zimanê kurdî bi nav û deng bûbû, ji ber ku xwest zarokên kurd fêrî zimanê wan ê dayikê bike, di destpêka sala 2020’an de, bi tawanbariya ’avakirina komekê ji bo têkbirina ewlehiya neteweyî’, ji aliyê rêjîma Îranê ve hat girtin û ji aliyê dadgeha Sinê ve 5 salan ceza lê hat birîn.
Di 10`ê Sibata 2023’an de, Zara Mihemedî bi riya rûpela xwe ya Instigramê re peyamek da û ragehand ku ew hatiye berdan û wiha got: “Dema ku ez berdam, agahiya malbata min, parêzer, hevalên min an jî tu endamên Nûjînê pê tune bû. Binçavkirin û îşkencekirina min jî neheq û bêyî îradeya min bû. Berdana min jî ne li ser daxwaza min bû.Min daxwaza lêborîn/efûyê nekiriye. Baweriya min bi rêya min tê û heta dawiya jiyana xwe ez ê li ser ramanên xwe bim.”
Hêjayî bibîrxistinê ye ku mamaosteya zimanê Kurdî Zara Mihemed Ji hingê ve li Girtîgeha Jinan a Sineyê dihat ragirtin.
