Bi nêzîkbûna salvegera Komploya Navneteweyî û zêdebûna êrîşên kîmyawî yên dewleta Tirk a dagirker yên li dijî qadên gerîla, Mecilsa Malbatên Şehîdan a abajarê Qamişlo daxuyaniyek da.
Navenda Nûçeyan
Meclisa Malbatên Şehîdan a bajarê Qamişlo derbarê Komploya Navneteweyî û êrîşên dewleta Tirk a dagirker yên li ser qadên gerîla li Goristana Şehîd Delîl Saroxan a bajarê Qamişlo , daxuyaniyek da.
Meclisa Malbatên Şehîdan di daxuyaniya xwe de diyar kir bi bilindbûna asta şer û pevçûnan li Rojhilata Navîn ku li dijî vîn û daxwazên gelan in, salvegera komploya navdewletî ya ku di şexsê Rêber Abdullah Ocalan de gelê Kurd kir armanc, ev komploya ku nirxên dostanî û mirovatiyê ku welatên Rojavayî hertim xwe bi wan didin nasîn, pûç kir û wiha got: “Ev komploya hovane ya ku di şexsê Rêber Ocalan de gel, dîrok û çanda kurdî armanc girt tevî ku kiryarên wê roj bi roj bi xapandin û planên nû yên hovane pêk tînin. Lê li hember berxwedana mezin a ku Rêber Apo li zindanê û gerîlayên qehreman li çiyayên Kurdistanê nîşan didin, hemû plan û armancên dagirkeran pûç dibin û têk diçin.”
Meclisê da xuyakirin ku dewleta Tirk a dagirkedr ji bo ku berxwedana gelê Kurd ji holê rake hemû çekên nûjen û qedexe li dijî îradeya gelê Kurd û gelên herêmê bi kar tîne û wiha domand: “Bi bilindbûna asta berxwedanê li çiyayên Kurdistanê û bi sekna lehengên me li hember zilm û zordariyê, vî dijminî hemû çekên nûjen û qedexe bi kar anî, berê li Agirî, Dêrsim, Cûdî û Çelê bi kar aniye û niha jî li Zap, Avaşîn û Metînayê bi kar tîne. Lê belê li hember hevgirtina berxwedana gel a bi gerîla re, dijmin nekarî tu serkeftinên girîng bi dest bixe.”
Meclisê helwesta hêz û saziyên navneteweyî şermezarkir û got: “Li gel delîlên eşkere bikaranîna van çekan ji aliyê faşîzmê ve îspat dike, civaka navneteweyî nikarîbû Erdogan rawestîne û wî di sînorê wî bisekinîne. Em bang li hemû gel û rêxistinên azadîxwaz dikin ku nerazîbûna xwe ya li dijî pêkanînên dewleta Tirk ên li hemberî gelê me yê Kurd ê ji bo azadiya xwe têdikoşe mezintir bikin.”
Meclisa Malbatên Şehîdan diyar kir ku divê gelê Kurd li her derê hêza xwe û dengê xwe ji bo teşhîrkirina faşîzmê bike yek û got: “Ya ku dikeve ser milê me ew e ku em têkoşîna xwe mezin bikin, ji bo birêxistinkirina gelê xwe, xurtkirina pergala xwe ya parastinê, projeya ku Rêbertî ji bo azadiya jinan û civakê daye destpêkirin, temam bikin”
