Navenda Nûçeyan
HPG’ê bi daxuyaniyekê ragehand ku êrîşên dewleta Tirk yên li dijî çeperên berxwedanê yên gerîlayên azadiyê, bênavber dewam dikin û got, di çalakiyên gerîlayan de li qada Çemçoyê pergaleke kamerayê ya mobeseyê hate têkbirin.
Navenda Ragihandin û Çapemeniyê ya HPG’ê derbarê çalakiyên gerîlayên azadiyê û êrişên artêşa Tirk a dagirker de daxuyaniyek da.
HPG’ê diyar kir ku di çalakiyên hêzên wan de pergaleke kameraya mobeseyê hate têkbirin, herwiha artêşa Tirk a dagirker gelêk caran çeperên berxwedanê bi çekên giran topbaran kirin û got: “Artêşa Tirk a dagirker 2 caran bi bombeyên qedexe, 13 caran bi balafirên şer û bi dehan caran jî bi obus, tank û çekên giran çeperên berxwedanê yên gerîla bomberdûman kir.”
HPG’ê da zanîn ku di çarçoveya Pêngava Şoreşgerî a Bazên Zagrosê de li herêma Zapê, di 30’ê Çileyê saet 17:00’an de pergaleke kameraya mobeseyê ya ku dagirkeran li derdora çeperên gerîla yên li nêzî herêma Çemço ya navçeya Şêladizêya Amêdiyê bi cih kiribûn, ji aliyê tîmên wan yên gerok ve hate îmhakirin.
HPG’ê da xuyakirin ku di çarçoveya Pêngava Şoreşger ya Bazên Zagrosê de li herêma Xakurkê, di 30’ê Çileyê saet 11.00’an de li Qada Berxwedanê ya Girê Şehîd Şahan, tîmên wan yên gerok bi çekên giran li dagirkeran dan. Herwiha di çarçoveya Pêngava Şoreşger ya Cenga Xabûrê ya Şehîd Savaş Maraş de, di 27’ê Çileyê saet di 05:15’an de li Qada Berxwedanê ya Girê FM tîmên me yên gerok bi çekên giran li dagirkeran dan.
HPG’ê derbarê êrîşên artêşa Tirk a dagirker ên bi bombeyên qedexe û çekên kîmyewî wiha got: “Di 29 û 30’ê Çileyê de çeperên berxwedanê yên gerîla yên li derdora herêma Çemço ya girêdayî navçeya Şêladizê ya Amêdiyê du caran bi bombeyên qedexekirî hatin bombekirin.Di 13, 26, 27 û 28’ê Çile de qadên Stûnê, Şûkê, Dola Maran, Dola Konferansê û Geliyê Avaşîn ên Avaşînê, her wiha Qadên Berxwedanê yên Girê Cûdî, Girê Bihar û Girê Amêdiyê 13 caran bi balafirên şer bomberdûmankirin. Di 26, 27, 28’ê Çileyê de, Qadên Berxwedanê yên Girê Cûdî, Girê FM û Girê Amediyê, herêma Çemço ya girêdayî navçeya Şêladizê ya Amêdiyê û çeperên berxwedanê yên gerîla yên li nêzî gundê Sîda bi dehan caran bi tank, çekên giran û obusan hatin bombekirin.”
