Vîrona Evdikê piştî ku Serêkaniyê hate dagirkirin, ji bajêr derdikeve lê niha xewna vegerê li Serêkaniyê xêz dike û dibêje, “Ez jinek im ku ji zikê şoreşa Rojava hatime dine. Kes nikare rîşa min bişikîne.”
Vîrona Evdikê sala 2003’yan li Serêkaniyê ya dagirkirî ji dayik bûye. Piştî ku bajarê wê ji aliyê dewleta Tirk a dagirker ve tê dagirkirin, tevî malbata xwe koçber dibe û li Qamişloyê bi cih dibe. Her wiha di Komîteya Têkiliyan û Lihevkirinan a Kongra Star de wergêra Ingilîzî ye.
Vîrona dibêje: “Sala 2016`an, hezkirina şoreşa jinan ji bo min peyamek bû ku êdî tablyonên min xwedî wateyên kûrtir in. Xwezaya bajarê min gelekî alîkariya min kir. Ew û jin di tabloyên min de cihekî mezin digirin, ji ber ku ji hev cuda nabin.”
Tirkan atolyeya wê dagir kir
Vîrona ji sala 2016’an heta 2019’an bi dehan wêne xêz kirin, lê ew berhemên wê tevî atolyeya wê hatin talankirin. Vîrona atolyeya xwe wek dinyaya xwe ya taybet bi nav dike: “Di atolyeya xwe ya li Serêkaniyê de min gelek tablo xêz kirin. Ew stargeha min bû, ew dinyaya min bû.”
Di 9’ê Cotmeha 2019’an de Serêkaniyê ji aliyê dewleta Tirk a dagirker ve hat dagirkirin. Ew roj ji bo Vîronayê rojeke reş bû: “Bajarê min tarî bû û dagirkeriyê hemû reng ji atolyeya min dizîn. Min nekarî tiştekî bi xwe re bibin. Tabloyên min li wir mane. Ji bo min ew şikestinek bû.”
Vîrona sala 2021’ê bi du tabloyan beşdarî pêşangeha li Qamişlo bû û sala 2022’yan jî beşdarî pêşangeheke din bû.
Vîrona niha wêneyê zarokê bi navê Mihemed xêz dike ku di êrişên bi çekên kîmyewî de ji aliyê dewleta Tirk a dagirker ve li Serêkaniyê, birîndar bûbû: “Bi rêya tabloyên xwe ez êşên şêniyên Serêkaniyê tînim ziman. Ji cîhanê re xuya dikim çi bi serê bajarê min de hatiye. Dixwazim qîrîna Mihemed di wicdanê cîhanê de zindî be. Ji ber dagirkeriyê, xewnên me hatin talankirin. Ez soz didim ku bi rîşa xwe xizmeta doza jinan û gelê xwe bikim. Ez dev ji xewna xwe ya vegerê bernadim.” -ANHA