Xwendekara Kurd a bi navê Meryem Ferecî ku li Tahranê rûdinişt û berî 9 rojan winda bibû, cenazeyê wê şewitandî hate dîtin.
Li gorî nûçeya kampanya parastina girtiyên siyasî û medenî, êvara 13 tîrmehê polîsên Tahranê cenazeyê jinek ku hatî şewitandin dîtin û piştî encamên testa DNA’yê derket ku cenaze yê xwendekara Kurd Meryem Ferecî ku berî 9 rojan li Tahranê winda bibû ye.
Ferecî di dema xwepêşandanên dawiya sala borî û destpêka 2018’ê li Îranê rû dan de, hatibû binçavkirin.
Di Nîsana îsal de ji aliyê Dadgeha Şoreş a Îtlaata Îranê ve 3 sal cezayê girtîgehê û 2 sal jî cezayê qedexeya çûna derveyî welat lê hate birrîn. Piştre bi şertê girtina bi kontrol hate berdan.
Parêzerê Meryem Ferecî, Mihemed Hisên Axasî jî di 12’ê Tîrmehê de li ser hesabê xwe yê taybet Twîtterê belav kiribû ku hefteyeke Ferecî ji malê deketiye û ti agahî jê nayên girtin. Axasî diyar kiribû ku metirsiya kuştina Ferecî heye.
Meryem Ferecî xwendekarek Kurde û temenî 33 sale û xelkê Serpal Zehawî ya girêdayî Kirmaşana Rojhilatê Kurdistanê ye. Ferecî li Tahranê di şîrketekê de kar dikir.
Posta çûyî