Heta êrîş hebin wê berxwedan jî hebe

Ciwanên Başûrê Kurdistanê ji gelek navendan çûn Qendîlê û serdana mertalên Zindî kirin, piştre jî çûn serdana Şehîdgeha Mehmed Karasungur.
Ji bo beşdarbûna çalakiya bîranîna ‘Berxwedana Zîndanê ya 14’ê Tîrmehê ya Rojiya Mirinê’ ji gelek navendên Başûrê Kurdistanê ciwan berê xwe dan Qendîlê.
Ji Silêmanî, Helebce, Çemçemal, Mexmûr, Raperin, Kerkûk û çend navendên din ciwan çûn Qendîlê û serdana çalakiya Mertalên Zindî ya ku 36 roje li dijî dagirkeriya dewleta Tirk didome, kirin.
Ciwanên Başûrê Kurdistanê ji aliyê ciwanên enternasyolîst ên Spanya û Swîsreyê ku ji berî 3 rojan çalakî dewir girtin ve hatin pêşwazî kirin. Wê ciwanên Spanî û Swîreyî hefteyekê çalakiyê berdewam bikin.
Piştî ku ciwanan serdana Mertalên Zindî kirin, li herêma kon lê hatiye vedan, govend gerandin. Piştre ciwan bi gelê Binarê Qendîlê re bi karwanekî çûn Şehîdgeha Şehîd Mehemed Karasungur ziyaret kirin.
Li ser navê Mertalên Zindî Tolhildan Zîlan daxuyanî da.
Daxuyanî wiha ye; “ Zilm, dagirkerî û êrîşên dewleta Tirk di ti deman de, berxwedan û îradeya gelê Kurd neşikand. Em bang dikin ku her kes li dijî dagirkeriyê tevlî têkoşîn û berxwedanê bibe. Weke ciwan me bi rihê berxwedana 14’ê Tîrmehê li Qendîl li dijî dagirkeriyê dest bi çalakiya mertalên zîndî kir. Li cihekê êrîş û dagirkerî hebe, li hemberî wê berxwedan jî heye. 36 roje em li dijî dagirkeriyê berxwedanek mezin dikin. Bi ruhê 14’ê Tîrmehê me soza mezinkirina têkoşînê didin.”