Navenda Nûçeyan/Qamişlo
Di bin diruşmeya “Pêkve Ber bi Ragihandineke Bîrwer, Berpirs û Sinc ve” konferansa Yekîtiya Ragihandina Azad ya 6`an bi armanca gotûbêjkirina rastiya ragihandinê li herêmê û danîna plansaziyek ji bo derbaskirina zehmetiyan û gihandina asta pêwîst, li bajarê Qamişlo hat lidarxistin.
Konferans bi deqeyeke rêzgirtinê li ser giyanê şehîdan dest pê kir û piştre Hevserokê Yekîtiya Ragihandina Azad Bankîn Sîdo axivî û lidarxistina konfransa şeşan ya Ragihandinê li tevayiya xebatkarên ragihandinê pîroz kir û bal kişand ser girîngiya avakirina Yekîtiyê ji bo hembêzkirina tevahî saziyên ragihandinê û rojnamevanan. Herwiha ji bo destpêkirina kar û çalakiyên xwe li herêmên ku di destpêkê de hatin rizgarkirin û piştre xwe li seranserê bakur û rojhilatê Sûriyê berfireh kir. 
Bengîn behsa rola xebatkarên ragihandinê di şopandina bûyeran û eşkerekirina rastiyên binpêkirin û dagîrkeriya ku li dijî gelên herêmê hatine kirin kir û got, gelek rojnemavanan di van çend salan de li ber xwe dan û rastiya heyî, herwiha hovîtiya DAIŞ`ê û kiryarên wê yên dijî gelê hermên bakur û rojhilatê Sûriyê derxistin holê û rewşa heyî ji cîhanê re didan xuyakirin heta ku gihîştin asta şehadetê.
Benîg Herwiha da xuyakirin ku armanc lidarxistina Konferansa şeşan ya Yekîtiya Ragihandina Azad, nîqaşkirina rewşa herêmê û rola ragihandina azad di derxistina rastiyan de ye.
Hevserokê Yekîtiya Ragihandina Azad Benkîn Sîdo bang li hemû xebatkarên çapemeniyê kir ku bi zelalî û fedekarî erka xwe ya çapemeniyê pêk bînin.
Piştre Seroka Beşa Ragihandinê ya Rêveberiya Xweser ya Bakur û Rojhilatê Sûriyê Ciwan Ibrahîm jî wiha got, ji ber ku me texmîn nedikir ku di rojeke wiha de hejmareke wiha ji rojnamevanan kom bibin, em bi vê kombûnê pir kêvxweş dibin. Ev tev bi saya berxwedana gel û şervana ye. Herwiha destnîşan kir ku Yekîtiya Ragihandina Azad yek ji encamên şoreşa 19ê Tîrmehê ye.
Ciwan Rastiya ragihandinê ya beriya şoreşê û astengiyên ragihandinê eşkere kir û da zanîn ku bi rêya Yekîtiya Ragihandinê rastiyên li Sûriyê û Rojhilata Navîn bi giştî hatin naskirin. Li bakur û rojhilatê Sûriyê em rastî her cureyên êrîşan di her warî de tên û gelê me ji bo derbaskirina hemû qeyranan têdikoşe û li berxwe dide, lewma berpirsyariya mezin dikeve ser milê rojnamevanan ku zêdetir bixebitin û dengê civakê û rastiyê derxînin.
Ciwan wiha berdewamî da axaftina xwe: Rojnamevan îro ne ji bo şopandina û nivîsandina nûçeyan tenê ne, dibê bizanibin wateya vê nûçeyê û bikevin kurahiya wê de. Divê em bi vî awayî karê ragihandinê bikin. Em bi dijmin re rû bi rû ne. Dijminê me hewl dide wêneyê çapemeniyê û tevgera gel ya li herêmê xirab bike û ji holê rake.
Herwiha li ser navê Tevgera Civaka Demokratîk (TEV-DEM) Leyla Îbrahîm axivî û rola xebatkarên jin yên di nava ragihandinê de nirxand û keda jinê di vî warî de pîeoz kir.
Piştre rapora salê ya Yekîtiya Ragihandina Azad hat xwendin û nîqaşa wê hat kirin.
Bi vî awayî konferans xebatên xwe didomîne.