Dewleta Tirk a dagirker hebûna xwe li ser tunebûna Kurdan avakiriye. Mixabin hê jî wê feraseta xwe hewldide bidomîne.
Tevî ku ewqasî hewldanên Kurdan çêbûn da ku bikaribin pirsgirêkên heyî bi rê û rêbazên demokratîk ango bihevdîtin û bi lêhevkirinê çareser bikin, dewleta dagirker a Tirk carek din vegeriya moda xwe ya sedan salan. Bi gotinek din, vegeriya moda înkar û îmha kirina Kurdan.
Tevî ku dewleta dagirker a qirker hebûna xwe di tunebûyîna Kurdan de ango di tunekirina Kurdan de dibîne, hê jî hinek Kurd-çendî Kurdan ew jî cihê pirsê û gumanêye-xwe bi dewleta Tirk re aliqandin e û ji wan qut nabin.
Bêguman ti hêzên dagirker vekirî nabêjin ku ewê bixwazin welatê ku wan dagirkiriye tune bikin. Bêguman tu hêzên faşîzan nabêjin ku ew faşîst in û dij mirovahî ne.
Bêguman ti hêzên dagirker-herî zêde jî dagirkeriya dewleta Tirk-nabêje ku ew dixwazin Kurdan tune bikin.
Lê gundê xûyadike pêwîstî nîn e ku jê re rêber hebe.
Pêwîst nîne ku were gotin ku dewleta dagirker û qirker, armanca xwe tune kirina Kurdan e.
Pêwîst nîne ku were gotin di roja îro de hêza dagirker a Tirk dixwaze tevahî destkeftiyên Kurdan ji destê wan de derbixe û tevahî destkeftiyên wan tune bike.
Ma pêwîstî heye ku em bêjin ku gotinên dewleta dagirker a Tirk a ku dibêje hedefa me tenê PKK´ye, derew in.
Ma yên ku her roj qala pevajoya beriya Lozanê dikin ne ew in?
Ma yên ku her roj dibêjin sînorên me sînorên Mîsakî Mîllî ne, ne ew in?
Ma yên ku her roj dibêjin dem dema meye û li Heleb heyanî Musul-Kerkûk jî coxrafya me ye, ne ew in?
Heta yên ku dibêjin Selanîk jî, Batum jî ya me ye, ma ne ew in?
Ma pêwîst dike em bêjin yên ku Heleb û Musul-Kerkûk wek cihê bav û kalên xwe dibînin û dihasibînin, Kurdan ti caran nasnakin?
Ma rastî ne ev in?
Kî dikare bêje ku rastî ne ew in?
Bi gotinên şaîrê mezin yê Kurd Abdullah Pêşew eger em bêjin:
Xayîn in ewên dibêjin
“Dan û mûrî birayên hev in“
Xayîn in ewên dibêjin
“Xwîn û zîlo birayên hev in“
Xayîn in ewên dibêjin
“Masî û çengel
Dest û derzî
Werîs û gerden
Dûzan û mû birayên hev in“
Werin xelkno!
Ji nêçîr û birînê bipirsin
Bêjin Xwedê kî Xencer heye birîn derman bike?
Nêçîrvan heye, nêçîr nexwe?
De xelkno!
Ji kayê bipirsin
Tu car agirê sar dîtiye?
Ji hêlîna teyr bipirsin
Bi niyeta maçê tu car mar devê xwe kiriye wê?
De ji dara berrû bipirsin
Bivir dîtiye darbir nebe?
De ji kerekê jî bipirsin
Gur dîtiye kerxwur nebe?
Xayîn in ewên dibêjin
“Marê şîrînjehr jî heye”
Xayîn in ewên dibêjin
“Bivrê birê dar jî heye”
Qasim ENGÎN
