Nîqaşên rakirina Rewşa Awarte xeyalîne

Hevserokên Giştî yên HDP’ê Buldan û Temellî, bertek nîşanî biryarnameya (KHK) dawî hat derxistin dan û gotin: “Nîqaşên rakirina OHAL’ê xeyalîne.”
Hevserokên Giştî yên Partiya Demokratîk a Gelan HDP’ê Pervîn Buldan û Sezaî Temellî, derbarê KHK’a Hejmara 701’an a di çarçoveyê Rewşa Awarte hat derxistin de, daxuyaniyek nivîskî weşandin û bertek nîşan dan.
Di daxuyaniyê de wiha hat gotin: “18 hezar û 632 perrsonel ji kar hatin avêtin. Rojnameyên Ozgurlukçu Demokrasî, Welat, Halkin Nabzi û 12 komele hatin girtin. Dîsa li Mêrsîn, Wan, Bedlîs, Mêrdîn û Rihayê endamên Egîtim Sen û SES’ê ji kar hatin avêtin. Bi KHK’a dawî akademîsyenên aştiyê jî ji kar hatin avêtin. Hejmara akademîsyenên ji kar avêtin derket 404’an. Lê li holê ne dadgehek û ne jî belgeyek heye ku van kesan ji kar bavêjin. Qaşo di bin navê serdema nû de, bi îxraç û binçavkirinan yekem pêngav avêtin. Nîqaşên rakirina OHAL’ê xeyalîne.”
HDP’ê di dawiya daxuyaniyê de banga têkoşîna demokrasiyê kir û wiha got: “Hesabên Serokê Giştî yê AKP û Serokkomar, bi kesên koletiya wan na kirin re, bi dawî nabe. Îro têkoşîna demokrasî, hiqûq û edalet ji hemû deman girîngtire û pêdivî heye ku bê mezinkirin. Divê kesên li dijî operasyonên koalîsyona desthilatdariyê bên gel hev û bi hevre têkoşîna demokrasiyê bi rêve bibin.”