Parlementerê HDP’ê yê Rihayê Omer Ocalan, diyar kir ku berpirsiyariya HDP’ê zêde bûye û got: “Hemû kesên ku dixwazin Tirkiye azad bibe, divê li dijî tecrîda li ser Ocalan tev bigerin.”
Piştî merasîma sondxwarinê, Meclîsa Tirkiyê dest bi xebatên serdema 27’emîn kir. Di vê serdemê de tişta tê meraqkirin ew e ku wê di pergala Serokomariyê ya ji aliyê AKP-MHP’ê ve hat pêkanîn de bandora Meclîsê çi be.
Lê belê, partiyên muxalefetê jî hewl didin ku Meclîsê dîsa çalak bikin û ji bo vê bi motîvasyona zîndekirina pergala parlementeriyê tev digerin. Hem cudatiya profîla parlementerên HDP’ê hem jî fikra wê ya li ser “rêgezên demokratîk”, HDP’ê bêtir derdixe pêş.
Parlementerê HDP’ê yê Rihayê Omer Ocalan, anî ziman ku HDP bêyî şik û guman wê barê bikeve ser milê wê bi cih bîne. Ocalan, anî ziman ku di rojeva wî de tecrîd, mafên gelên kurd û demokratîkbûyîna Tirkiyê heye. Ocalan bilêv kir ku tecrîda li ser Abdullah Ocalan tenê bi wî ne sînorkiriye û got: “A rastî îro civak hemû tê tecrîdkirin. Eger em doza azadî û demokratîkbûyîna vî welatî dikin, nexwe divê em li dijî tecrîdê derkevin. Ji roja ku tecrîd hatiye pêkanîn, li Tirkiyê maf û azadî lawaz bûne. Tirkiye ber bi karesatan ve diçe. Loma kesên ku li Tirkiyê difikirin divê hemû li dijî tecrîdê derkevin.”
Ocalan, bang li gelê kurd kir ku xwedî li mafên xwe derkevin û got: “Êdî lukseke me ya ku sedsaleke din jî ji dest me biçe tune ye. Eger em îro li azadiya xwe xwedî dernekevin, dê hemû tiştên me bi dest xistine jî biçin.” Ocalan, destnîşan kir ku tevî hemû êrîşan jî HDP bi awayekî hêzdar hebûna xwe ya li meclîsê didomîne û got: “Her ku êrîşî me dikin em zêdetir dibin û tên.”
Ocalan bal kişand ser yekîtiya netewî ya kurd û got: “Bi awayekî şexsî ez ê herî zêde li ser yekîtiya netewî ya kurd hûr bibim. Civakeke ku yekîtiya xwe pêk neyîne, nikare di tu tiştî de jî bi ser bikeve.”
Tevahiya Tirkiyê tê tecrîdkirin
