Li Qendilê li dijî êrîşên dagirkeriya dewleta Tirk çalakiya meratên zindî hatibû destpêkirin. Ji bajarê Kerkûk yê Başûrê Kurdistanê bi dehan ciwan beşdarî çalakiyê bûn.
Çalakiya ‘Mertalên Zindî’ ya Tevgera Ciwanên Başûr û Tevgera Jinên Ciwan di 8’ê Hezîranê li Qendîlê ku li dijî êrîşên dagirkeriyê yên dewleta Tirk dest pê kirî, di roja 21’an de didome. Piştgiriya ji bo ciwanan her ku diçe zêdetir dibe. Bi dehan ciwanên ji bajarê Kerkûkê çûn Qendilê û beşdarî çalakiya berxwedanê ya mertalên zindî bûn.
Ciwanên Kerkûkê diyar kirin ku ji bo bibin mertalê zindî hatine Qendilê. Ciwanan bal kişand li ser êrîşên dagirkeriyê yên li çar parçeyên Kurdistanê didomin û ragihandin ku ji bo xwedî li Başûrê Kurdistanê derbikevin li Qendîlê ne. Ciwanan diyar kirin ku di demên dawî de dewleta Tirk êrîşên dagirkeriyê li dijî Başûr zêde kirine û wiha gotin; “Bila dijmin baş bizane ku bi ti awayî em ê destûr nedin ku xaka me dagir bikin.”
Ciwanan destnîşan kirin ku xaka kevnar a Kurdistanê ne ya firotinê ye û ev peyam dan; “Em ê destûr nedin ku ev xaka pîroz carek din weke Kerkûkê were firotin. Ji bo vê em amade ne ku canê xwe feda bikin.”
Ciwanan bang li ciwanên Başûrê Kurdistan û hemû ciwanên Kurdistanê kirin ku xwedî li çalakiya mertalên zindî ya ciwanan a li Qendilê û Kurdistanê derbikevin.
Emê destûrê nedin dagirkeriyê
