Bêyî HDP demokrasî nabe

Piştî zelalbûna encamên nefermî yên hilbijartina 24’ê Hezîranê Hevserokên Giştî yên HDP’ê Pervin Buldan û Sezai Temelli li Enqereyê li Navenda Giştî ya HDPê encamên demkî nirxandin.
Hevseroka HDP’ê Pervin Buldan di axaftina xwe ya nirxandina encamên hilbijartinê de got: Encamên hilbjartinê nîşan dane ku gelên Tirkiyê destnîşan kiriye ku rejîmeke parlamenter bêyî HDP’ê, têkoşîneke demokrasî û edaletê bêyî HDP’ê nabe. Gelan diyar kirine ku aştî, demokrasî, jiyana azad û pirrengî bêyî HDP’ê nabe.” Derheqê encaman de hê jî gumanên me hene. Heta encamên fermî neyên eşkerekirin divê îtîbar bi encaman neyê dayîn.”
Pervin Buldan di berdewamiya axaftina xwe de got: “Tevî hemû astengî û neqanûniyan jî namzedê HDP’ê Selaheddin Demirtaş di hilbijartinên serokomariyê de sêyemîn derket. Piştî van encaman divê Demirtaş serbest were berdan. Em ê bi lijneyên rêvebir ên partiyê re civînên xwe li dar bixin û ji bo xebata pêşerojê binirxînin.”
Sezai Temelli jî di axaftina xwe de got: “Di dema kampanyeya hilbijartinê de gelek caran rêvebir û hevalên me rastî êrişan hatin, lê tevî her tiştî em ê li gor baweriya xwe ya bi demokrasiyê xebatên xwe bidomînin. Em ê îradeya hilbijêran biparêzin. Hetanî ev pêvajo bi dawî bibe em ê nobedariya xwe ya demokrasiyê bidomînin. Heta encamên dawî werin eşkerekirin em şopa xwe ya dengan bişopînin.”