Hêrsa gelê Kurd ya li çar perçeyên Kurdistanê li dijî dagirkeriya dewleta Tirk mezin dibe. Bi hezaran welatiyên Başûrê Kurdistanê ji Duhokê, Hewlêr, Silêmanî, Kerkûk, Germiyan, Raperîn, Şarezgor, Kifrî, Xurmatû, Çemçemal û Ranyayê çûn Çiyayê Qendîlê û li dijî dagirkeriya Tirk derketin.
Bi hezaran welatiyên Başûrê Kurdistanê ji bajar û navçeyên cuda berê xwe dan Qendîlê û li ber dagirkeriya dewleta Tirk rabûn.
Meşa gel a ber bi Qendîlê ve ji aliyê “Însiyatîfa Gel a li dijî êrîşên dagirkeriyê yên dewleta Tirk” ve hate organîzekirin.
Bi hezaran kesên ji gelek bajar û navçeyên Başûrê Kurdistanê bi rê ketin, sibeha Înê gihîştin Qendîlê.
Çalakger ji Duhokê, Hewlêr, Silêmanî, Kerkûk, Germiyan, Raperîn, Şarezgor, Kifrî, Xurmatû, Çemçemal û Ranyayê bi rê ketin.
Li dijî êrîşên dagirkeriyê yên dewleta Tirk, ji 8’ê Hezîranê û vir ve li Qendîlê çalakiya mertalên zindî heye. Girseya gel a ji Ranyayê hat, ji aliyê çalakgerên mertalên zindî ve hate pêşwazîkirin.
Girseya gel li mizgefteke nêzî cihê çalakiya mertalên zindî nimêja Înê kir. Mele Saman Sengavî li vir peyivî û got, “Ji bo em nîşan bidin ku bi ciwanên xwe re ne yên li vê derê li dijî dagirkeriyê bedena xwe kirine mertal em hatine vê derê.”
Sengavî li dijî dagirkeriyê ji bo berxwedanê bang kir û wiha dewam kir: “Hemû hêzên siyasî, rewşenbîr, nivîskar, alimên olî û tevahiya gelê me, divê teqez li cihê lê ne li ber dagirkeriyê rabin.”
