Konferansa rêveberên saziyên sivîl ên herêma Efrînê ya bi navê “Konferansa Rizgarkirina Efrînê” bi biryaran bi dawî bû. Di dawiya konferansê de encamname hat eşkere kirin.
“Konferansa Rizgarkirina Efrînê” bi beşdarbûna 250 endamên saziyên sivîl, civakî, çandî, aborî û Rêveberiya Xweseriya Demokratîk a Kantona Efrînê, hejmareke rewşenbîr, siyasetmedar, nûnerên MSD‘ê, Hevbendiya Niştimanî ya Demokratîk a Sûriyê hat lidarxistin.
Di konferansê de geşedanên dawîn hatin nîqaşkirin û nexşerêya rizgarkirina Efrînê hate danîn.
Axaftina destpêkê ya konferansê ji aliyê Endamê Desteya Rêveber a TEV-DEM‘ê Aldar Xelîl ve hate kirin. Xelîl lidarxistina konferasê pîroz kir.
Aldar Xelîl, destnîşan kir ku binpêkirinên ku li Efrînê ji aliyê dagirkeriya Tirkiyê û çeteyên wê rû dane li pêşiya hewldanên çareserkirina aloziya Sûriyê bû kelem û wiha axivî, “Parastina rewa û berxdwedana li hember dagirkeriyê mafê gelê Efrînê yê rewa ye. Berxwedan heta niha berdewame û wê ta serkeftinê dewam bike.”
Xelîl got, “Em berxwedana Serdemê bikin bingeha çareserkirina aloziya Sûriyê, li ser vê yekê biryarên ku di vê konferansê de werin derxistin dê bibe bingeha rizgarkirina Efrînê.”
Di konferansê de, endamên dîwanê ji 5 kesan hatin hilbijartin. Paşê rewşa, siyasî, dîplomasî, rêveberî, rêxistînî, aborî, leşkerî hatin nirxandin.
Di nirxandinan de, kêmasî û şaştiyên berê derketine hatin nîqaşkirin, her wiha nêrîn û pêşniyarên beşdaran derbarê pêngava rizgarkirina Efrînê de hatin guhdarkirin.
Beşdaran dirûşma “Bi rihê Berxwedana Serdemê em asta tolhildanê mezin bikin û Efrînê rizgar bikin” ji bo Pêngava Rizgarkirina Efrînê hilbijartin.
Di dawiya konferansê de encamname hat eşkerekirin û ji bo rizgarkirina Efrînê seferberiya giştî hate ragihandin.
Ji bo “Rizgarkirina Efrînê” seferberiya giştî
