Li çar aliyên Kurdistanê nerazîbûnên li dijî êrîş û dagirkeriya dewleta Tirk zêde dibin. Gelê Amûdê li dijî êrîşên dewleta Tirk yên li ser başûrê Kurdistanê meşeke girseyî lidarxistin. Di meşê de hat diyar kirin ku gelê Kurd wê li hember êrîşan li ber xwe bide û dawî li dîkatatoriya Erdogan bîne.
Şêniyên bajarê Amûde êrîşên li ser başûrê Kurdistanê şermezar kirin û bi dirûşma ‘Êdî bese ji dagirkeriyê re, bijî berxwedana gelê me’ meşek li dar xist.
Li bajarê Amûde meclisên TEV-DEM û Kongreya Star ji bo piştgiriya berxwedana gelê başûrê Kurdistanê û şermezarkirina êrîşên dewleta tirk meşeke girseyî li dar xist. Meş li Qada Şehîd Cîhad bi deqeyek rêzgirtinê dest pê kir.
Di meşê de wêneyên Rebêrê Gelê Kurd Abdullah Ocalan, alên YPJ/YPG hate hildan.
Meşê heya Navenda Ciwanan dewam kir û li wir vegeriya mîtîngê. Di mîtîngê de hevseroka kantona Qamişlo Pervîn Yûsif axivî û diyar kir ku çawa li Efrînê li ber xwe dan, dê li Başûr jî li ber xwe bidin û got: “Dagirkeriya dewleta tirk berê xwe daye başûrê Kurdistanê. Bila baş zanibin ku em bi gelê Başûr re ne. Em ji berxwedana xwe gavekê paşde naçin. Dawiya dîktatorî û hovîtiya Erdogan nêzîk e.”
Meşvanan bi sloganên ‘Bijî bexwedana Qendîlê’, ‘Bakur, Başûr, Rojava û Rojhilat yek xebat û yek armanc’, ‘Ji dagirkeriyê re êdî bes e’ mîtîng bi dawî kir…ANHA
